Túrkistan oblysynyń densaýlyq saqtaý salasy ardagerlerine qurmet kórsetildi

TÚRKІSTAN. QazAqparat – Respýblıka kúnine oraı, Túrkistan oblysynda densaýlyq saqtaý salasy ardagerlerine qurmet kórsetildi. Bul týraly QazAqparat oblys ákiminiń baspasóz qyzmetine silteme jasap habarlaıdy.

Atap aıtqanda, oblys ákiminiń orynbasary Arman Sabıtovtyń qatysýymen Densaýlyq saqtaý mınıstrliginiń vedomstvolyq nagradalaryn tabystaý rásimi ótti. Aq jeleńdi abzal jandar «Eńbek ardageri» jáne «Densaýlyq saqtaý isine qosqan úlesi úshin» tósbelgilerimen marapattaldy.

Túrkistan oblystyq qoǵamdyq densaýlyq basqarmasynyń basshysy Marat Pashımov óz kezeginde medıtsına salasyn jaqsartý maqsatynda eńbek etip júrgen qyzmetkerlerge «Densaýlyq saqtaý isiniń úzdigi» tósbelgisin tapsyrdy.

Jalpy, 2021 jyly Túrkistan oblysynda memlekettik-jekemenshik áriptestik baǵdarlamasy sheńberinde 4 feldsherlik-akýsherlik pýnkt salynyp, aýyl turǵyndaryna paıdalanýǵa berildi. Bıyl taǵy da 4 feldsherlik pýnkt qurylysy júrgizilip jatyr.

Sonymen qatar, aýyldyq jerlerde jáne shalǵaı eldi mekenderde turatyn halyqqa konsýltatsııalyq-dıagnostıkalyq qyzmetter kórsetý úshin barlyq qajetti qural-jabdyqtarmen jabdyqtalǵan jyljymaly medıtsınalyq keshender jolǵa shyǵaryldy.

2021 jyly 2 809 medıtsına qyzmetkeri biliktiligin arttyrdy, onyń ishinde 109 qyzmetker AQSh, Túrkııa, Reseı elderinde bilimderin jetildirdi. Osy jumystar bıyl da jalǵasyn taýyp jatyr. 2022 jyldyń 9 aıynda 1 223 medıtsına qyzmetkeri biliktiligin arttyrdy, sondaı-aq Túrkııa eline oqýǵa jiberý josparlanyp otyr. 2023 jyly 4 aýdandyq aýrýhanany (Saıram, Ordabasy, Saryaǵash, Jetisaı) kópbeıindi aýdandyq aýrýhana etip qaıta qurý kózdelgen.