Túrkistan oblysynyń barlyq aýdanynda «Jańa býyn ortalyqtary» salynady
Aýqymdy qurylys keler jyldyń basynda ońtústik aýmaqtardan bastalmaq. Alǵashqy ortalyqtar Jetisaı, Maqtaaral, Saryaǵash pen Keles aýdandarynda boı kóteredi. Áleýmettik nysandy aýdan ortalyqtarynda, saıabaqtarǵa jaqyn aýmaqta salý josparlanǵan.
Eki qabatty ǵımaratta saltanatty jıyndar ótkizýge arnalǵan májilis zaly bolady. Sonymen birge ǵylymdy damytýǵa baǵyttalǵan kıbernetıka, robototehnıka men fab-lab steam ortalyqtary ashylady. Óner, shyǵarmashylyq pen sport salalary boıynsha úıirmeler jumys isteıdi. Shahmat, toǵyzqumalaq jáne ústel tennısi úıirmeleri ashylady. Amfıteatr men oıyn alańdary bolady. Biregeı jobanyń tujyrymdamasyn bekitken oblys ákimi Darhan Satybaldy árbir ǵımaratty talapqa saı etip, janashyrlyqpen salýdy tapsyrdy.
«Aýdandarda halyqpen kezdesýde mádenıet úıin ashý týraly usynystar kóp aıtylady. Oılana kele, aýyl balalarynyń bilimin arttyryp, bos ýaqytyn tıimdi paıdalaný úshin kópsalaly erekshe ortalyqtar ashý týraly sheshimge keldik. Onda kelgen eresekter de, balalar da ózin óte jaıly sezinýi kerek. Balany ǵylymǵa jetelep, mádenıet pen sportqa baýlıtyn, ulttyq qundylyǵymyzdy úıretetin ortalyqty barlyq aýdanda ashýdy kózdep otyrmyz. Bizdiń óskeleń urpaq bilimdi, zııaly, mádenıetti, deni saý ári ónerli bolyp ósýi tıis», – dedi oblys ákimi.