Túrkistan oblysynyń aýylyndaǵy ınternet sapasyna baılanysty operatorǵa aıyppul salynady

NUR-SULTAN. QazAqparat – Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Túrkistan oblysynyń Jýsansaı aýylyna bardy, dep habarlaıdy QazAqparat.

«Túrkistan oblysyna sapary aıasynda birneshe eldi mekende boldym. Onyń barysynda ınternet sapasyna baılanysty shaǵymdar tústi. Birinshi kezekte, Jýsansaı aýylyna baryp, onda turǵyndar ınternet jyldamdyqpen qalaı jumys istep jatqany týraly aıtyp berdi. Áriptestermen birge baılanys sapasyn ólshedik. Bul aýyl «250+» baǵdarlamasy sheńberinde baılanyspen qamtamasyz etildi. Ókinishke oraı, bizge jumys esebi berilgendeı emes. Baılanys sapasyn jaqsartý qajet etedi. Tekserý ornynda baılanys operatorlarynyń ókilderimen birge ólsheý júrgizilip, qujat toltyryldy. Sheshim bireý - aıyppul salamyz!», dep jazdy mınıstr Instagram -daǵy paraqshasynda.

Onyń aıtýynsha, sapany qolaıly deńgeıge jetkizgenge deıin aıyppul salý jalǵasta bermek.
«Bul aýyldyń sapasyn maýsym aıyna deıin jaqsartýǵa ýáde berdi, biraq kelissózder nátıjesinde operatorlar sáýir aıynda barlyq problemany sheshýi tıis dep kelistik.
Men baılanys sapasyna qoıylatyn mınımaldy talaptar durys sheshim ekenine taǵy bir ret kóz jetkizdim! Buıryqta biz jyldamdyqtyń eń tómengi kórsetkishterin 3G - 1 mbıt/s kem emes, 4G - 5mbıt/s kem emes dep belgiledik. Eger operatorlar halyqqa osyndaı jyldamdyqty usyna almasa, qyzmet qunyn arttyrý máselesin kótere otyryp, biz zańmen belgilengen basqa da sharalardy qoldanatyn bolamyz», - dedi Baǵdat Mýsın.
Mınıstr quzyretti memlekettik organdarmen birge baılanys qyzmetterine baǵany egjeı-tegjeıli taldaý boıynsha jumys júrgizýge daıyn eken jetkizdi.