Túrkistan oblysynyń aýyl sharýashylyǵy salasyna amerıkalyq tehnologııalar engiziledi

TÚRKІSTAN. QazAqparat - Túrkistan oblysynyń ákimi Ómirzaq Shókeev halyqaralyq agroónerkásip kesheni salasynda mamandandyrylǵan amerıkalyq «Valmont Industries» kompanııasynyń basshysy Robert Gıllen bastaǵan bir top delegattarmen kezdesti.

Bul týraly Túrkistan oblysy ákimdiginiń baspasóz qyzmeti habarlaıdy.

Baspasóz qyzmetiniń málimetterine qaraǵanda, taraptar jańbyrlatyp sýarý tásilin qoldanýǵa qatysty ekijaqty yntymaqtastyq pen tájirıbe almasý josparlaryn talqylady. Atap aıtqanda, mehanıkalandyrylǵan, jańbyrlatyp sýarý júıesin qoldaný arqyly aýyl sharýashylyǵy ónimderin ósirip baptaıtyn mashına-traktor stantsııasyn qurý týraly aıtyldy. Sonymen birge jobaǵa salynǵan ınvestıtsııalar shamamen 50 mıllıon dollardy quraıdy.

Kezdesý barysynda Ómirzaq Estaıuly aýyl sharýashylyǵy óndirisine zamanaýı tehnologııalardy engizýdiń mańyzdylyǵyn atap ótti.

«Túrkistan óńirinde ınvestorlar úshin qolaıly jaǵdaılar jasalǵan. Biz árqashan tyǵyz yntymaqtastyqqa, birlesken jobalardy júzege asyrýǵa daıynbyz. Óńirimizdiń klımaty aýyl sharýashylyǵy ónimderin ósirý úshin óte qolaıly. Jańbyrlatyp sýarý ádisin paıdalaný aýyl sharýashylyǵy salasyn damytýǵa yqpal etetinine senimdimin», - dedi Ómirzaq Shókeev.

Óz kezeginde Robert Gıllen amerıkalyq sýarý tehnologııalary ósimdik daqyldaryn kóbeıtip, sý shyǵynyn 50 paıyzǵa tómendetetinin atap ótti. Sonymen qatar ınvestıtsııalyq jobamen tanystyrǵan AQSh delegatsııasy aýyl sharýashylyǵynda ǵana emes, energetıka, kólik, saýda-sattyq, azyq-túlik beldeýin qalyptastyrýda birlese jumys isteýge daıyn ekendikterin bildirdi.

Kezdesý qorytyndysy boıynsha aımaq basshysy birlesken jobalardy iske asyrý úshin jumys tobyn qurýdy jáne jańbyrlatyp sýarý óndirisiniń qural-saımandaryn ornatý úshin qajetti ınfraqurylymy bar laıyqty jer telimin bólýdi tapsyrdy.

Sondaı-aq, Ómirzaq Shókeev TNC Valmont Industries kompanııasynyń áleýetti jobalardy júzege asyrýdaǵy basty artyqshylyqtaryn atap ótti. Atap aıtqanda, aımaqtaǵy qurylys qarqynyn, túrli salalardaǵy jańa tehnologııalardyń qajettiligin jáne olardy júzege asyrý múmkindikterin, sondaı-aq ákimdik aımaqta sprınkler júıesin engizý jobalaryn keńeıtýdi josparlady.

Otyrystyń qorytyndysy boıynsha oblys ákimi Túrkistan oblysy ákiminiń orynbasary Meıirjan Myrzalıevtiń basshylyǵymen birlesken jobalardy iske asyrý úshin jumys tobyn qurýdy tapsyrdy.