Túrkistan oblysynyń arnaıy toby shyǵysqa kóshken otbasylardyń ómirimen tanysty

ÓSKEMEN. QazAqparat – Túrkistan oblysynyń arnaıy nasıhattyq toby «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy aıasynda Shyǵys Qazaqstan oblysyna sapar shekti. Jaýapty mekeme jetekshileri men qoǵam jáne BAQ ókilderinen jasaqtalǵan top músheleri «Serpin» baǵdarlamasymen bilim alyp jatqan stýdentterdiń, ońtústikten kóship barǵan otbasylar men jastardyń tynys-tirshiligimen tanysty, dep habarlaıdy QazAqparat tilshisi.

Oblys ortalyǵy Óskemenge at basyn tiregen túrkistandyqtardy ShQO Jumyspen qamtýdy úılestirý jáne áleýmettik baǵdarlamalar basshysynyń orynbasary Tımýr Jigitaev qarsy alyp, keleli kezdesý uıymdastyrdy. Jınalǵandar halqy tyǵyz qonystanǵan oblystardan turǵyndary sıregen óńirlerge azamattardy kóptep kóshirý joldaryn talqylady.

Aıta keteıik, aǵymdaǵy jyly Shyǵys Qazaqstan oblysy boıynsha qonys aýdarýshylar men oralmandardy qabyldaýdyń óńirlik kvotasy 2161 adamdy (651 otbasy) quraǵan. Onyń ishinde qonys aýdarýshylar –1566 adam (456 otbasy), oralmandar 595 adam (195 otbasy) bolyp bekitildi. Baǵdarlamany iske asyrý úshin memlekettik bıýdjetten jol shyǵyndaryn óteýge 231,9 mln teńge bólinse, úıdi jaldaýǵa 190,9 mln teńge qarastyrylǵan. Bıyldyń ózinde eńbek kúshi mol aımaqtardan kóship kelgen 850 adamnyń 288-i jumysqa ornalastyrylǵan. Sondaı-aq 263 adam turaqty jumys ornymen qamtylsa, jastar praktıkasyna, qoǵamdyq jumystarǵa 25 adam tartylǵan. Kásipkerlikpen 11 adam aınalysýda.

Sondaı-aq «Serpin» jobasynyń 64 túlegi qonys aýdarǵan. Túrkistan oblysynan bıyldyń ózinde ShQO-ǵa 54 otbasy, 104 azamat kóship barǵan. Búgingi tańǵa deıin qonys aýdarǵandardyń basym bóligi turǵyn úımen, jumysqa qabiletti otbasy músheleri jumyspen qamtyldy. Óz kásibin ashamyn deýshilerge egin, mal sharýashylyǵymen shuǵyldanýǵa jer telimderi, bos turǵan ǵımarattar usynyldy. Kóship-qonýǵa baılanysty memleket tarapynan beriletin materıaldyq kómektermen qamtamasyz etilýde.