Túrkistan oblysynyń ákimi óńirde azyq-túlik baǵasyn turaqtandyrýdy tapsyrdy
Eldegi tótenshe jaǵdaı jáne uzartylǵan karantın kezinde saýda nysandarynyń qyzmetin toqtata turýy teńge baǵamynyń tómendeýin, halyq tarapynan suranysty shektep taýarlar baǵasynyń ósýine alyp keldi, deıdi mamandar.
Sol sebepten sharýalarǵa aýdandardaǵy egistik alqaptarda pııaz ben sábiz sekildi maýsymdyq kókónis túrlerin kóptep egý usynyldy.
Oblys boıynsha áleýmettik mańyzy zor azyq baǵasyn turaqtandyrý maqsatynda saýda oryndary jáne saýda bazarlary arasynda 540 memorandýmǵa qol qoıylǵan. Alaıda, aýdan, qala ákimdikteri tarapynan baǵa turaqtylyǵyn qamtamasyz etýdi qadaǵalap, baqylaý júrgizilmeýinen, birshama azyq-túlik baǵalarynyń ósimi baıqalyp otyr.
Atap aıtqanda, Túrkistan, Kentaý qalalarynda, Báıdibek, Sozaq aýdandarynda taýardyń birneshe túri boıynsha baǵa ósken. Osyǵan qaraı oblys ákimi barlyq jaýapty basshylarǵa halyq kóp tutynatyn taýarlardyń baǵasyn turaqtandyrýdy tapsyrdy.
Óńirde áleýmettik suranystaǵy 19 túrli azyq-túlik taýarlarynyń baǵasy baqylaýǵa alynǵan. Baǵany turaqty ustaý úshin oblystyq turaqtandyrý qory saýda ortalyqtaryna taýarlar jetkizip otyr. Halyq kúndelikti tutynatyn taýarlardyń baǵasyn turaqtandyrý maqsatynda birqatar is-shara qolǵa alynýda. Bazardaǵy azyq-túlik baǵalarynyń qubylyp turatynyn eskergen oblys basshylyǵy kásipkerlermen áleýmettik mańyzy bar azyq-túlik taýarlarynyń baǵasyn negizsiz kótermeý jóninde jıyn ótkizip, ortaq kelisimge kelgen.
Arnaıy mobıldi top baǵany kúndelikti baqylap otyr. Óńirlik turaqtandyrý qory arqyly baǵa suratý tásilimen qosymsha 403,4 tonna azyq-túlik taýarlaryn (qaraqumyq jarmasy - 50 tn, qyryqqabat - 101 tn, makaron ónimderi - 32 tn, kartop - 59 tn, sábiz - 101,8 tn, qumsheker - 53 tn, sıyr eti - 6,6tn) satyp alyndy.