Túrkistan oblysynyń ákimi kisi qolynan qaza tapqan 5 jasar qyzdyń otbasynda bolyp, týystaryna kóńil aıtty
Túrkistan oblysynyń ákimi Darhan Satybaldy Saryaǵash aýdanyna bardy. Jibek joly aýyl okrýginde kisi qolynan qaza tapqan 5 jastaǵy qyzdyń shańyraǵynda bolyp, ata-anasyna, jaqyndaryna kóńil aıtty. Qaıǵylaryna ortaq ekenin aıtyp, quranǵa qatysty.
«Óte aýyr jaǵdaı. Qaıǵylaryńyzǵa ortaqpyn. Jubatýǵa sóz tabý qıyn. Kishkentaı balapannyń aýyr qazasy bárimizdi kúızeltti. Qazir kúdikti ustaldy. Zań aıasynda qatań jazalanady», – degen oblys ákimi qaıǵy jamylǵan otbasyǵa jan-jaqty qoldaý kórsetiletinin jetkizdi.
Búginde Saryaǵash aýdany, Jibek joly aýylynda bolǵan qylmysqa qatysty kúdikti ustalyp, qamaýǵa alynǵan.
Oqıǵa ornyna 13 shilde kúni túnde erekshe baqylaý jáne turǵyndarmen qosymsha túsindirý jumystaryn júrgizý maqsatynda oblysy ákiminiń orynbasarlary N.Kósherov, B.Tájibaev, oblys prokýrory M.Tileýberdıev, Túrkistan oblysy polıtsııa departamentiniń bastyǵy M.Qabdenov, UQK Túrkistan oblysy boıynsha departamenti bastyǵynyń birinshi orynbasary T. Meldeshov bardy.
Pyshaq jaraqatynan qaıtys bolǵan qyzdyń denesi sot-medıtsınalyq saraptamadan ótkennen keıin 14 shilde kúni jer qoınyna tapsyryldy. Saraptama qorytyndysy jedel túrde 20 kún ishinde shyǵarylady.
QR Prezıdenti Bas prokýratýra men ІІM-ne bolǵan qaıǵyly oqıǵanyń mán-jaıyn muqııat tekserýdi tapsyrdy. Kúdiktige qatysty QR qoldanystaǵy zańnamasy sheńberinde tıisti sharalar júrgiziledi.
Oblys ákimi Darhan Satybaldynyń qatysýymen Saryaǵash aýdany, Jibek joly aýyl okrýginiń ákimdiginde oqıǵa oryn alǵan aımaqtaǵy ózekti máseleler talqylandy. Oǵan barlyq quzyrly organ basshylary men jergilikti turǵyndar qatysty. Óńir basshysy shekaralas aımaqty damytý, saýda-logıstıkalyq áleýetin tıimdi paıdalaný, kóleńkeli ekonomıkany joıý baǵytyndaǵy jumysty kúsheıtýdi tapsyrdy.
«Shekara mańyndaǵy zańsyz saýda aınalymyna tosqaýyl qoıý kerek. Kásipkerlerge jaǵdaı jasap, zańdastyrý máselesin sheshý qajet. Osy salaǵa jaýapty mekemeler, quzyrly organdar óz jumystaryna jaýapkershilikpen qaraǵany jón. Turǵyndar tarapynan túrli máseleler kóterilip jatyr. Nazarǵa alynyp, tıisti jumys júrgizilsin. Zańsyzdyqtarǵa qarsy qatań sharalar qabyldanýy qajet», – dedi Darhan Satybaldy.
Jaýapty mekeme basshylaryna kásipkerlerge jaǵdaı jasaý, qoldaý kórsetý jóninde tapsyrma berildi. Zańsyz saýda, kóleńkeli ekonomıka, zańsyz alkogoldi ónimder saýdasy, tramadol satýǵa tosqaýyl qoıý jáne ózge de mańyzdy máseleler kóterildi.
Aıta keteıik, Memleket basshysy Túrkistan oblysyndaǵy qaıǵyly oqıǵanyń mán-jaıyn muqııat tekserýdi tapsyrǵan bolatyn.
Al, búgin kisi qolynan kóz jumǵan 5 jasar búldirshinniń denesi jer qoınyna tapsyryldy.
Túrkistan oblystyq soty osy ýaqytqa deıin adam óltirip, 10 jyl túrmede otyryp kelgen adamnyń nelikten shartty jazaǵa kesilgenin túsindirdi.