Túrkistan oblysyndaǵy shekara beketterinde jyl basynan beri 86 adamnan KVI anyqtaldy

TÚRKІSTAN. QazAqparat - Jyl basynan beri Túrkistan oblysynda ornalasqan Jibek joly, Qaplanbek, Qazyǵurt, Qonysbaev, Atameken ótkizý keden beketteri arqyly Ózbekstan memleketinen 94 219 adam Qazaqstan terrıtorııasyna kirgen. 7 420 adamnan PTR synama alynyp, 3 435 azamat 2 kúndik karantınge jiberildi. Al, 86 adamnan COVID-19 ınfektsııasy anyqtalǵan, dep habarlaıdy QazAqparat tilshisi.

QR Bas memlekettik sanıtarııalyq dárigeriniń memlekettik shekara arqyly ótkizý pýnktterindegi shekteý is-sharalary týraly jańa Qaýlysyna sáıkes, 5 mamyrdan bastap elge kiretinder saýalnama toltyrmaıtyn boldy. Termometrııadan ótýdiń qajeti joq. Sonymen qatar, olardan PTR synama alynbaıdy.

Degenmen, el aýmaǵyna ótetin azamattar vaktsına, revaktsına saldyrǵan bolýy kerek. Eger ekpe almaǵan bolsa nemese alǵanyna 6 aıdan asyp ketse, qolynda PTR anyqtamasy (72 saǵattan artyq emes) bolýy shart.

Eger vaktsınatsııa pasporty da, PTR anyqtamasy da bolmaǵan jaǵdaıda, turǵylyqty jeri boıynsha 72 saǵattyń ishinde zerthanalyq tekserýden ótetindigi týraly qolhat jazyp, shekara beketinen ótedi. Dene qyzýy joǵarylap, aýyryp turǵan adamdar anyqtamasynyń bolǵanyna qaramastan, ınfektsııalyq statsıonarda oqshaýlaýǵa jatady.

Al, 5 jasqa deıingi balalardan vaktsına, revaktsına, PTR synama, anyqtama usyný talap etilmeıdi. QR aýmaǵyna Eýrazııalyq ekonomıkalyq odaqqa múshe memleketterdiń aýmaǵynan, sondaı-aq Ázirbaıjan, Moldova, Tájikstan jáne Ózbekstan Respýblıkalarynyń aýmaǵynan keletin adamdar anyqtamany «COVID-19-syz saıahat» mobıldi qosymshasymen usynady.

Aıta keteıik, búgingi kúni Túrkistan oblysynda 5 shekara ótkizý beketi jumys jasap tur.

Budan buryn habarlanǵanyndaı, elde koronavırýsqa qarsy ekpe alǵandar 10 mln jaqyndady.