Túrkistan oblysyndaǵy «Mektebińe dombyra syıla» estafetasy kelesi aýdanǵa joldandy

TÚRKІSTAN. QazAqparat – Túlkibastan bastaý alǵan «Mektebińe dombyra syıla» aktsııasy ózge aýdandarǵa estafeta retinde usynyldy, dep habarlaıdy QazAqparat tilshisi.

Dombyra kúni qarsańynda túlkibastyqtar «Mektebińe dombyra syıla» aktsııasyn qorytyndylady. Іs-sharada elýden astam jas dombyrashy kúı shertip, kópshiliktiń qoshemetine bólendi. Sóıtip, «Mektebińe dombyra syıla» estafetasy Saýran aýdanyna tabystaldy.

«Jalpy, ótken jyly Ulttyq dombyra kúninde «Dombyra únimen boı kótergen jańa Saýran» atty kúıshiler fleshmobyn uıymdastyrǵan bolatynbyz. Qazaq úshin qasıetti meken bolyp esepteletin kóne shaharda ótken sharanyń basty maqsaty – qazaqtyń kúıi arqyly tarıhy tereń, talaı ǵasyr boıy syryn ishine saqtaǵan Saýran qalashyǵynyń jańa tańy atqanyn, endi ǵana qurylǵan Saýran aýdanynyń jańa dáýiri bastalǵanyn nasıhattaý edi. Bıyl da bul is-sharalar jalǵasyn taýyp jatyr. Estafeta aıasynda alǵan dombyrany mektep basshylaryna tabystaımyz. Ár mektepte atalǵan aktsııany jalǵastyryp, ulttyq aspapty ulyqtaımyz», - deıdi Saýran aýdany ákiminiń orynbasary Serik Sadıbekov.

Aıta keteıik, atalǵan aktsııa QR Parlamenti Májilisiniń depýtaty Darhan Myńbaıdyń usynysymen qolǵa alynǵan edi. Aýdanǵa kelgen saparynda ustazdarmen kezdesken halyq qalaýlysy ulttyq aspapty ulyqtaý jóninde oı tastaıdy. Ideıany qup kórgen Sastóbe aýylynyń A. Makarenko atyndaǵy mektebiniń túlekteri aktsııany alǵash bolyp ótkizedi.

Ótken jyldyń aıaǵynda bastaý alǵan aktsııa barysynda Túlkibas aýdanyndaǵy mektepterge 400-ge jýyq dombyra syıǵa tartyldy. Mekteptiń túlekteri men depýtattar, kásipkerler, ardager ustazdar men aýyl turǵyndary aktsııaǵa belsendi qatysty.