Túrkistan oblysyndaǵy medıtsınalyq mekemelerge kórsetilgen qyzmetteri úshin 20,3 mlrd teńge tólengen
Janserik Esimovtyń aıtýynsha, tólemniń basym bóligi statsıonarda kórsetilgen medıtsınalyq qyzmetterge tıesili bolǵan.
«Mindetti áleýmettik medıtsınalyq saqtandyrý júıesi engizilgen alǵashqy 9 aıda kórsetilgen medıtsınalyq qyzmet kóleminiń artqanyn ańǵarýǵa bolady. Baǵasy qymbat analızder, halyqtyń qaltasy kótere bermeıtin dıagnostıka men operatsııa túrleri jyl basynan beri saqtandyrý qory esebinen kórsetilip jatyr. Karantın kezinde saqtandyrylǵan turǵyndar baǵasy qymbat medıtsınalyq qyzmetterdi jıi paıdalanýǵa múmkindik aldy. Qarjynyń 7,1 mlrd. teńgesi halyq tarapynan úlken suranysqa ıe bolyp otyrǵan konsýltatıvtik-dıagnostıkalyq qyzmet túrlerine tólendi. Máselen, aǵymdaǵy jyldyń 9 aıynda 11 442 KT/MRT qyzmeti kórsetilgen. Oǵan 176 mln teńge tólendi. Bul ótken jyldyń osy ýaqytymen salystyrǵanda eki ese kóp. Saqtandyrylǵan turǵyndar karantın kezinde 1,3 mlrd teńgege PTR-test tapsyrdy. Sondaı-aq, Qor qarajatty profılaktıkalyq tekserýlerge, medıtsınalyq reabılıtatsııa jáne qalpyna keltirýge baǵyttalǵan em-dom úshin tóledi», – dedi Janserik Esimov.
Aıta keterligi, azamattar belgili bir medıtsınalyq qyzmet kórsetilmegen jaǵdaıda Qordyń «1406» baılanys ortalyǵyna habarlasa alady. Al ótinishter men shaǵymdardy MSQ «Qoldau 24/7» qosymshasy arqyly da qaldyrýǵa bolady.Sonymen qatar, brıfınge qatysqan Túrkistan qalalyq emhanasynyń dárigeri Aqnur Álhanova elimizde azamattardy emhanaǵa tirkeý naýqany aıaqtalǵanyn baıandady. Onyń málimdeýinshe, bıyl qyrkúıektiń 15-i men qarashanyń 15-i aralyǵynda ótetin dástúrli naýqan barysynda Túrkistan oblysynyń 30 myńnan astam turǵyny emhana aýystyrǵan. Bıylǵy tirkeý naýqany barysynda emhana aýystyrǵan azamattar jańa emdeý mekemesiniń qyzmetin 2021 jyldyń 1 qańtarynan bastap paıdalana alady.