Túrkistan oblysyndaǵy kisi ólimine soqtyrǵan kólik apatyna qatysty tergeý bastaldy
18:43, 07 Aqpan 2023
ASTANA. QazAqparat - Túrkistan oblysynda oryn alǵan jol kólik oqıǵasyna qatysty tergeý bastaldy, dep habarlaıdy QazAqparat Polisia.kz saıtyna silteme jasap.
7 aqpanda aýa raıynyń qolaısyzdyǵyna baılanysty Shymkent-Samara tas jolynyń 56 shaqyrymynda Mercedes Benz avtokóligi taıyp ketip, aldynda júrip bara jatqan ózbekstandyq azamattyń Kia Carnival kóligine soqtyǵysqan.
Jol apaty saldarynan Mercedes Benz kóliginiń bir jolaýshysy oqıǵa ornynda kóz jumyp, júrgizýshisi aýrýhanaǵa túsken.
Qazirgi tańda oqıǵa ornynda anyqtaýshylar men krımınalıster jumys jasaýda. Atalǵan jaıt boıynsha QR QK-niń 345-baby 3-bóligimen sotqa deıingi tergeý amaldary bastaldy. Oqıǵanyń tolyq mán-jaıy tergeý barysynda anyqtalady.