Túrkistan oblysyndaǵy Qarabulaq aýylynyń jastary «Jıgýlıdi» sánge aınaldyrdy
Túrkistan oblysynda Qarabulaq atty aýyl bar. Saıram aýdanyna qarasty bir ǵana eldi mekende 70 myńǵa jýyq adam turady. Barshasy da eńbekqor. Nesibesin Jer-Anadan izdegen dıqandar men mal sharýashylyǵynan mol paıda taýyp otyrǵan kásipkerlerdiń deni osynda qonystanǵan. Aýyldaǵy eń basty ereksheliktiń biri – jergilikti turǵyndardyń kópshiligi «Jıgýlı» markaly avtokólik minetindiginde.
«Jıgýlı – bizdiń aýyldyń brendi. Ásirese, jastar sándep, tıýnıng jasap minip jatady. Úılený toılarynda retro kóliktermen kortej jasap júredi. Eń alǵashqy shyqqan «VAZ-2101», «VAZ-2102», «VAZ-2106», «VAZ-2107» markaly kólikterge zamanýı jaryq ornatyp, boıap, áınekterin sándegende keıbirin tanymaı da qalamyz», - deıdi aýyl turǵyny Babyr Hasantaev.
Shynynda, Qarabulaqta bul kólik markasynyń kóptegen túrin kezdestirýge bolady. Taksıge de tıimdi, júk artsań da jeńil qımyldaıdy. Eń bastysy, sharýashylyqqa qolaıly. Qosylqy bólshekteri qoljetimdi ári shyǵyny da az. Sondyqtan bolar, mundaǵy kópshilik ony «mal tabar» kólik sanaıdy.
Máselen, aýyl turǵyny Zafarjan Kamalov es bilgeli «Jıgýlı» kóligin minip keledi. Qazir kólik tizgindegenine de 20 jylǵa jýyqtapty. Osy kezeńde Shymkent, Qyzylorda, Tashkent qalalaryna jolaýshylar tasyǵan. Aýyl arasynda 1 tonnaǵa deıin júk artyp, jerlesteriniń úıine jetkizip bergen kezderi de kóp.
«Maǵan qolaıly kólik. Ózim kez kelgen kezde jóndep ala alamyn. Tipti, keı kezderi synǵan jerlerin symmen, jippen baılap ta júre beretin kezderim boldy. Sondyqtan, tilin túsingen adamǵa jaqsy kólik», - deıdi ol.
Al, aýyl jastarynyń biri Ǵaıbıddın Isamovtyń «Jıgýlıi» – aýyldaǵy eń qymbat kóliktiń biri. 1975 jyly shyqqan «VAZ-2101» markaly avtosyna qosalqy bólshekter ornatyp, qýattylyǵyn arttyrǵan. Erekshe túske boıap, tóbesine lıýk ornatqan. Terezeleri tetik arqyly ashylyp, jabylady. Al, tórt dóńgelegi avtomatty túrde joǵary-tómen qozǵalady. «01» markaly kóligine 001 memlekettik nomerin arnaıy satyp alǵan. Bir sózben aıtqanda, bozbalanyń minip júrgen kóligi eshqandaı sheteldik ınomarkadan kem emes.
«Mende «VAZ-2101» kóliginiń ekeýi bar. Biri 1975 jyly, ekinshisi 1984 jyly shyqqan. Ekeýiniń de jaǵdaıy jaqsy. Alǵashqysyn Aqtaý qalasynan alyp keldim, al ekinshisin, aýyldan satyp aldym. Kóshede qyzyǵýshylyqpen toqtatatyndar kóp. Biri motoryn kórse, biri dóńgelegine qyzyǵyp jatady. Qymbat baǵalap, satýymdy suraǵandar da boldy. Biraq, eshbirine kelispedim. Biz bul kóliktermen toılarǵa tapsyrys qabyldaımyz. Kortej jasap, qalyńdyqty alyp kelemiz», - deıdi ol.
Jalpy, Qarabulaqta sánge aınalǵan kóliktiń baǵasy da «ushyp» tur. Eń arzany 1 mln teńgeden kem emes. Al, jaǵdaıy jaqsylary 2 mln teńgeniń ústinde turady.