Túrkistan oblysyndaǵy eń qart ardager - 102 jasta
Túrkistan oblysynda Ekinshi dúnıejúzilik soǵystyń 15 ardageri bar. Odan bólek, 150 adam soǵysqa qatysýshylar men múgedekterine teńestirilgen.
Eń qart ardager - 102 jastaǵy Rysmet Jumaǵulov Tólebı aýdanynyń Lengir qalasynda turady. Aýdandaǵy jalǵyz ardager «Otan soǵysy» ordenimen, «G.K.Jýkov» merekelik medaldarymen marapattalǵan.
«1921 jyly 5 synypty bitirgen soń, qara jumysqa erte aralasyp, Georgıevka kolhozynda eńbek ettim. 1942-1943 jyldary Stalıngradty qorǵaýǵa qatystym. Elge oralǵan soń 1945-1974 jyldar aralyǵynda kúzet bóliminde qaraýyl jáne qosalqy sharýashylyqta jumysshy boldym. Al, 1974-1976 jyldary Fosfor zaýytynda jumys istep, zeınetke shyqtym»- deıdi ol.
Búgin Tólebı aýdanynyń ákimi Tólegen Telǵaraev jáne aýdandyq máslıhat tóraǵasy Nurlan Qoıbaǵarov 102 jastaǵy Rysmet Jumaǵulovtyń úıine arnaıy baryp, merekemen quttyqtady.
«Sol bir zulmat jyldardy bastan keshken aldyńǵy aǵa býyn ókilderiniń tózimdiligi men erjúrektiligi búgingi jáne keleshek urpaq sanasynda naǵyz adamgershiliktiń, otansúıgishtiktiń úlgisindeı bolyp qala bermek. Tarıh enshisinde qalǵan soǵystyń surapyl jyldary endi qaıtalanbasyn dep tilep, sondaǵy aıbarly aǵa-ápkelerimizdiń jan aıamas jaýjúrektiligi men tyl eńbekkerleriniń eren eńbekterine qurmetpen bas ıemiz», – dedi aýdan ákimi.
Sondaı-aq, otan úshin ot keshken Jeńis soldatynyń estelik áńgimelerin tyńdap, aýdannyń jańalyǵyn, el jaıyn áńgimelep, syı-qurmet kórsetti. Qan maıdanda erlikpen qaza tapqan azamattardyń rýhyna bas ıip, quran baǵyshtaldy. Aqsaqal kelgen qonaqtarǵa aq batasyn berdi.