Túrkistan oblysyndaǵy barlyq keden beketterinde udaıy dezınfektsııa jasalady

TÚRKІSTAN. QazAqparat - Álemdi alańdatqan koronavırýstyń Túrkistan oblysy aýmaǵyna shekara arqyly enýine jol bermeý maqsatynda qatań sharalar qolǵa alyndy, dep habarlaıdy QazAqparat óńirlik memlekettik kirister departamentine silteme jasap.

Osyǵan oraı, shekaralyq ótkizý pýnktterinde dezınfektsııa jumysy júrgiziledi. Sanıtarlyq dárigerler ǵımarattardy tazartady. Bul jumystar shamamen 2 saǵatqa jalǵasady jáne osy ýaqytta ótkizý pýnktileri jabylady. Zalalsyzdandyrý jumysyn ár aptanyń sársenbi jáne beısenbi kúnderi júrgizý josparlanǵan. Bul - aımaq turǵyndary men qonaqtarynyń qaýipsizdigi úshin jasalynyp otyrǵan shara.

«Túrkistan oblysy boıynsha memlekettik kirister departamentinde 6 shekaralyq keden beketi bar, olar - «Qazyǵurt», «Jibek joly», «Qaplanbek», «Saryaǵash stansasy», «Baýyrjan Qonysbaev» jáne «Atameken». Búgingi tańda barlyq keden beketteri shtattyq rejımde jumys isteýde. Qazir keden tótenshe jaǵdaıdyń jańa deńgeıi jarııalandy. Sanıtarlyq baqylaý táýlik boıy júrgiziledi. Túrkistan oblysyna Qytaıdan jáne basqa shet elderden kelgender sanıtarlyq epıdemıologtar men shekarashylardyń arnaıy baqylaýynan ótedi» delingen habarlamada.

Esterińizge sala keteıik, barlyq keden beketteriniń ótkizý pýnkterinde teplovızorlyq beınekameralar men qol ólsheýishteri bar ınfraqyzyl kameralar ornatylǵan. Olar dene temperatýrasy kóterilgen adamdy 15 metr qashyqtyqtan tabýǵa múmkindik beredi. Bul jaǵdaıda júıe arnaıy mamanǵa dabyl beredi.