Túrkistan oblysyndaǵy 85 mektepte ashana joq
Memleket basshysynyń tapsyrmasyna sáıkes, búgingi tańda oblystaǵy 1-4 synypta oqıtyn 187 832 bala qyrkúıekten bastap tegin ystyq tamaqpen qamtamasyz etilgen. Kúndelikti as mázirine saı, bastaýysh synyp oqýshylaryna ártúrli taǵamdar berilip keledi. Degenmen, balalarǵa berilip jatqan astyń qaýipsizdigi basty nazarda bolýy shart.
«Túrkistan oblysynda 1000-ǵa jýyq bilim berý uıymdary bar. Búgingi kúnge 85 mekteptiń ashanasy joq, al 202 mektep ashanasy sanıtarııalyq-epıdemıologııalyq qorytyndysyz jumys júrgizýde. Tegin tamaqtandyrýdy uıymdastyrý barysynda balalardyń jappaı ýlanýyna jol bermeý, ınfektsııalyq aýrýlardyń aldyn alý jáne jalpy densaýlyǵyna zııan keltirmeý qazirgi tańda basym baǵyttardyń biri bolyp qalady. Ol úshin mektep ashanalarynyń jaǵdaıy sanıtarııalyq talaptarǵa sáıkes bolýy jáne bul ashanalarda daıyndalatyn taǵamnyń qaýipsiz bolýy tıis» - dedi Nurbek Nyshanov.
Al, Túrkistan oblysynyń bilim basqarmasy basshysynyń mindetin ýaqytsha atqarýshy Ardaq Sadyqova ashanasy joq mektepterde qosymsha bólmeler qarastyrylyp, ystyq tamaq berýge jaǵdaı jasalǵandyǵyn jetkizdi. Sondaı-aq, 51 mektepke modýldik ashana salý isi qarastyrylyp jatqandyǵyn aıtty.