Túrkistan oblysynda jyl basynan beri eńbek shartyna qatysty 734 shaǵym túsken

TÚRKІSTAN. QazAqparat – Túrkistan oblysynda bıylǵy 8 aıda eńbek ınspektsııasy basqarmasyna eńbek shartyna baılanysty 734 azamattan aryz-shaǵym túsken. Bul týraly basqarma basshysy Berik Ibadýllaev málimdedi, dep habarlaıdy QazAqparat tilshisi.

Basqarma basshysynyń sózinshe, mekemeler men kásiporyndarda 192 tekserý júrgizilgen. Nátıjesinde barlyq shaǵymdanýshylarǵa zań aıasynda ýaqytyly tıisti jaýap berilgen.

Degenmen Berik Ibadýllaev eńbek shartynyń buzylýyna baılanysty shaǵymdar sany ótken jyldyń tıisti kezeńimen salystyrǵanda 25,8 paıyzǵa kemigenin aıtady.

«Bıyl kelip túsken shaǵymdarda kóbine jalaqy tóleý merziminiń, eńbek shartynyń, jumys ýaqyty normasynyń buzylýy jáne eńbek demalysyn ýaqytyly bermeý máseleleri kóterilgen. Júrgizilgen tekserýlerdiń nátıjesinde 208 zań buzýshylyq anyqtalǵan. Onyń 186-sy joıylyp, zańǵa sáıkestendirildi. Qalǵandaryna qatysty oryndaý merzimi bar», – deıdi Berik Serikbaıuly.

Basqarma basshysy sondaı-aq, 2020 jyldyń qańtar-tamyz aılarynda oblys mekemeleri men kásiporyndarynda jalaqyny zańmen belgilengen merzimnen keshiktirip tólegen 5 jaǵdaı anyqtalǵanyn atady.

Al, ótken jyldan qordalanǵan jáne ótpeli jalaqy qaryzy bar 2 kásiporynnyń 22 jumysker aldynda 41,7 mln teńge bereshegi qalǵan.

«Eńbek qaýipsizdigi jáne eńbekti qorǵaý talaptarynyń buzylýy boıynsha 27 jaǵdaı tirkelgen. Mundaı zań buzýshylyqtardyń oryn alýyn jumys berýshilerdiń jáne laýazymdy jaýapty qyzmetkerleriniń Eńbek zańnamasyn elemeýi, ony oqyp-úırenýge talpynbaýy, jumys berýshilerdiń osy máselege jetkilikti kóńil bólmeýimen baılanysty. Buǵan, sondaı-aq, keıbir jumys berýshilerdiń eńbek zańnamasyn qasaqana buzýy da keri áserin tıgizýde», - deıdi Berik Ibadýllaev.