Túrkistan oblysynda jol-kólik oqıǵasynan qaıtys bolǵandar kóbeıgen
Túrkistan oblysynda jol-kólik oqıǵalarynyń saldarynan qaza tapqandar sany 1,1%-ǵa artqan. Zardap shekkender qatary, ásirese eldi mekenderdegi joldarda ósken. Apattyń kóbi kóliktegi jyldamdyqty asyrý, qarsy baǵytqa shyǵý, manevr jasaý erejelerin saqtamaý saldarynan bolǵan. Shilde aıynyń ózinde óńirde úsh iri jol-kólik oqıǵasy tirkelgen. Barlyǵynda qarsy baǵytqa shyqqan kóliktiń saldarynan apat bolǵan.
«Joldaǵy apat sany azaımaı tur. Alaıda eń bastysy, qaıǵyly oqıǵany boldyrmaýdyń naqty nátıje beretin joldaryn taýyp, júzege asyraıyq. Jol qaýipsizdigin qamtamasyz etý men júrgizýshiler arasynda júrgizý tártibin qalyptastyrý boıynsha nátıjeli sharalar qabyldanýy qajet. Іshimdik pen psıhotropty zattardy qoldanyp, kólik basqarǵan azamattar da qaıǵyly oqıǵalardy kóbeıtip otyr. Polıtsııa departamenti osyndaı jaǵdaılarǵa jol bermeýi kerek. Bul baǵytta jumysty kúsheıtińizder, – dedi Túrkistan oblysynyń ákimi Darhan Satybaldy.
Túrkistan oblysy Polıtsııa departamenti bastyǵynyń mindetin atqarýshy Baǵlanbek Aıtpaevtyń málimdeýinshe, oblysta 430 myńnan astam avtokólik tirkelgen. Kúnine 25 myńǵa jýyq avtokólik respýblıkalyq mańyzy bar joldan ótedi.
Al oblystyq Jolaýshylar kóligi jáne avtomobıl joldary basqarmasynyń basshysy Rolan Ibragımov joldar men kóshelerde kólik jáne jaıaý júrginshilerdiń qaýipsiz qozǵalysyn qamtamasyz etý men qolaıly qozǵalysty uıymdastyrý maqsatynda basqarma tarapynan 4 baǵytta jumys júrgizilip jatqanyn jetkizdi. Atap aıtqanda, joldardy jóndeý, jaqsy jáne qanaǵatty jaǵdaıdaǵy joldardyń úlesin arttyrý, jol belgilerin ornatý, jol tańbalary men jaıaý júrginshi jolaqtaryn syzý, joldarǵa jaryqtandyrý shamdaryn ornatý jáne aıaqjoldar salý.