Túrkistan oblysynda jemqorlyq jasaǵandarǵa 73 mln teńge aıyppul salynǵan

TÚRKІSTAN. QazAqparat - Qol astyndaǵy qyzmetker jemqorlyqpen shatylsa, birinshi basshy jumystan ketý jóninde ótinish jazýǵa mindetti. Osy jáne ózge de máseleler Túrkistan oblysynyń ákimi Ómirzaq Shókeevtiń tóraǵalyǵymen ótken jıynda talqylandy, dep habarlaıdy QazAqparat oblys ákiminiń baspasóz qyzmetine silteme jasap.

QR Memlekettik qyzmet jáne sybaılas jemqorlyqqa qarsy is-qımyl týraly zańdaryna engizilgen ózgerister men tolyqtyrýlar týraly oblys ákimi Ómirzaq Shókeevtiń tóraǵalyǵymen ótken Túrkistan oblysy ákimdigi janyndaǵy Sybaılas jemqorlyqqa qarsy is-qımyl máseleleri jónindegi onlaın rejımdegi komıssııa otyrysynda aıtyldy. Komıssııa múshelerinen bólek barlyq aýdan, qala ákimderi men basqarma basshylary jıynǵa beıne-baılanys arqyly qatysty. Otyrysta ótken jyly atqarylǵan jumys qorytyndylanyp, 2020 jylǵa jumys jospary quryldy.

Jıynda QR Memlekettik qyzmet jáne sybaılas jemqorlyqqa qarsy is-qımyl týraly zańdaryna engizilgen ózgerister men tolyqtyrýlar týraly QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy Hakım Kóshqalıev jáne osy salaǵa jaýapty basshylar baıandama jasady. Prezıdent Qasym-Jomart Toqaevtyń jemqorlyqqa tózbeıtin qoǵam qalyptastyrý úshin usynǵan mindetteri túsindirildi.

2019 jylǵa bekitilgen josparyna sáıkes, májilis otyrystarynda qaralǵan ózekti máseleler boıynsha naqty 32 hattamalyq tapsyrma berilgen. Sybaılas jemqorlyqqa qarsy kúresti kúsheıtý maqsatynda komıssııa «Nur Otan» partııasynyń Túrkistan oblystyq fılıaly janyndaǵy sybaılas jemqorlyqqa qarsy is-qımyl jónindegi qoǵamdyq keńespen birlesip, aldyn alý boıynsha keńester men keshendi jumystar júrgizedi.

«Túrkistan - adaldyq alańy» jobasy aıasynda oblystyq sybaılas jemqorlyqqa qarsy qyzmet departamenti men birgelikte aýqymdy sharalar iske asyrylýda. Atap aıtsaq, byltyr alǵash ret Sybaılas jemqorlyqqa qarsy halyqaralyq Túrkistan forýmy ótkizildi. Quqyqtyq statıstıka jáne arnaıy esepke alý jónindegi komıtet basqarmasynyń málimetinshe, 2019 jyly oblys aýmaǵynda sybaılas jemqorlyq qylmysy boıynsha 82 adam kúdikti dep tanylǵan. Onyń 48-i aýmaqtyq memlekettik, quqyq qorǵaý jáne ózge de organdardyń qyzmetkerlerine qatysty, 34-i jergilikti atqarýshy organdardyń qyzmetkeri.

Sybaılas jemqorlyq qylmysyn jasaǵan tulǵalarǵa 73 mln 862 myń tenge aıyppul taǵaıyndalyp, óndirildi. 34 faktiniń 24-i aýdan men qala ákimdikteriniń derbes bólimderi men aýyl ákimdikteriniń laýazymdy qyzmetkerleri. Basym kópshiligi Jetisaı, Saryaǵash, Kentaý, Báıdibek, Maqtaaral jáne Ordabasy aýdandarynda tirkelgen.

Otyrysty qorytyndylaǵan Ómirzaq Estaıuly komıssııa músheleriniń nazaryn sybaılas jemqorlyqqa qarsy kúres jumysynda jiberilgen kemshilikterdiń birsaryndylyǵyna jáne azamattyq qoǵam ınstıtýttarymen tyǵyz qarym-qatynasty qamtamasyz etýge aýdardy.