Túrkistan oblysynda jemqorlardan tárkilengen qarajatqa 9 mektep salynyp jatyr

ASTANA. QazAqparat – Ortalyq kommýnıkatsııalar qyzmetinde ótken brıfıngide Túrkistan oblysynyń ákimi Darhan Satybaldy óńirde jemqorlardan tárkilengen qarajat esebinen 9 mektep salynyp jatqanyn aıtty, dep habarlaıdy QazAqparat tilshisi.

«Oblysta bilim salasynda 2511 uıym qyzmet kórsetedi. 1 372 mektepke deıingi uıymda 155 myń bala tárbıelenýde. 2-6 jastaǵy balalardy balabaqshamen qamtý 98%-ǵa jetti. Oblystaǵy jalpy bilim beretin 1000 mektepte 515 myń oqýshy bilim alady. Oblysta 5 jylda jańa 86 mektep salyndy», - dedi ákim.

Aıtýynsha, aımaqta 35 myń oqýshy orynǵa tapshylyq bar.

«Atalǵan máseleni sheshý úshin qazir 33 mektep salynyp jatyr. Onyń ishinde, «Bilim ınfraqurylymyn qoldaý qory» arqyly bıyl 9 mekteptiń qurylysy júrýde. Bıyl 20 mektepti paıdalanýǵa tapsyrý josparlanyp otyr. Budan bólek, «Jaıly mektep» pılottyq jobasymen 3 jylda 63 mektep salynady. Prezıdenttiń tapsyrmasyna sáıkes, 894 memlekettik mekteptiń qaýipsizdigin qamtamasyz etý úshin jergilikti bıýdjetten tıisti qarjy bólindi. Osy arqyly beınebaqylaý, týrnıket, qorshaý, dabyl túımesi ornatylady. Arnaıy kúzet qyzmetimen qamtylady. 1-4 synyptaǵy oqýshylardy tegin tamaqpen qamtamasyz etý máselesi tolyq sheshildi», - dedi aımaq basshysy.