Túrkistan oblysynda jaz bastalmaı jatyp 13 adam sýǵa batyp ketti

TÚRKІSTAN. QazAqparat - Túrkistan oblysynda jyl basynan beri 13 adam sýǵa ketken, onyń 9-y balalar, dep habarlaıdy QazAqparat tilshisi.

Túrkistan oblystyq tótenshe jaǵdaılar departamentiniń málimetinshe eń kóp sýǵa ketý jaǵdaılary Ordabasy aýdanynda tirkelgen.

Munda jyl basynan beri 3 adam sýǵa ketken.

Al, Báıdibek pen Saýran jáne Túlkibas aýdanynda 2 jaǵdaıdan, Qazyǵurt pen Maqtaaralda, Otyrar aýdany men Túrkistan qalasynda 1 jaǵdaıdan tirkelgen.

Onyń ishinde ata-anasynyń qaraýynsyz qalǵan 9 bala sýǵa ketip qaıtys bolǵan.

Úsh bala ózenge, úsh bala kanalǵa qulap ketken. Úı arasyndaǵy aryqtardan da 3 balanyń máıiti tabylǵan.

«Sý aıdyndarynda «sýǵa túsýge tyıym salynady» degen belgi ornatylǵan jerlerde, júzýdiń shekarasyn belgileıtin qalqybelgilerden keıin shomylýǵa, shaǵyn kemelerdi paıdalanýǵa, mas kúıinde sýǵa túsýge tyıym salynady. Balalardy qaraýsyz qaldyrmańyzdar», - delingen Túrkistan oblysy tótenshe jaǵdaılar departamentiniń baspasóz qyzmeti taratqan aqparatta.