Túrkistan oblysynda zańsyz aınalymnan 7 tonnaǵa jýyq janarmaı ónimderi tárkilendi
Túrkistan oblysy polıtsııa departamenti men uıymdasqan qylmysqa qarsy kúres basqarmasy qyzmetkerleri kentterdiń birinde janar-jaǵarmaı materıaldaryn zańsyz satýmen aınalysqan jergilikti turǵyndy anyqtady. Polıtseıler kúdikti áıeldiń dúken qoımasynan túrli konteınerlerge quıylǵan shamamen 500 lıtr benzın men rezeńke shlangty aıǵaqty zat retinde tárkiledi.
Sondaı-aq jedel ýákilder Saryaǵash aýdanynda ornalasqan qaraýsyz qalǵan janar-jaǵarmaı beketinde munaı ónimderin tıisti qujattarsyz zańsyz saqtaý jáne satý deregin tirkedi. Jergilikti turǵynnan tártip saqshylary 5 tonna dızel otyny bar tsısterna tárkiledi.
Janar-jaǵarmaı materıaldaryn zańsyz satýdyń derekteri Sozaq, Túlkibas jáne Keles aýdandarynda da tirkeldi.
«Otyn-Energetıka» jedel-profılaktıkalyq sharasy aıasynda QR QK-niń 197-baby 1-bóligi «Munaı men munaı ónimderin tasymaldaý, satyp alý, ótkizý, saqtaý, sondaı-aq olardyń shyǵý teginiń zańdylyǵyn rastaıtyn qujattarsyz munaıdy qaıta óńdeý» boıynsha 6 jaıtty tirkedi. Zańsyz aınalymnan 7 tonnaǵa jýyq janar-jaǵarmaı, onyń ishinde dızel men benzın aldy. Qazirgi tańda barlyq anyqtalǵan jaıttar boıynsha sotqa deıingi tergeý amaldary júrgizilýde»-delingen Túrkistan oblysy polıtsııa departamentiniń baspasóz qyzmeti taratqan aqparatta.
Ashyq kózderden alynǵan foto