Túrkistan oblysynda veterınarııalyq ahýal turaqty - ákimdik

TÚRKІSTAN. QazAqparat - Túrkistan oblysynda janýarlardyń asa qaýipti 14 aýrýyna qarsy 28 mln 555 myń doza vaktsına egildi. Búgingi tańda óńirdegi veterınarııalyq ahýal qatań baqylaýda, dep habarlaıdy QazAqparat óńirlik kommýnıkatsııalar qyzmetine silteme jasap.

Bul týraly búgin óńirlik kommýnıkatsııalar qyzmetinde ótken brıfıngte aýyl sharýashylyǵy basqarmasynyń basshysy Nurbek Badyraqov málimdedi.

Enzootııalyq aýrýlardyń aldyn alý boıynsha kóktem, kúz aılarynda 2 mln 518,6 myń bas iri mal búrkilse, 8 mln 147,6 myń bas usaq mal toǵytylǵan. Sondaı-aq, úı irgelik qora jaılar men japsarlas aýmaqtary men býferlik aýmaqtar zalalsyzdandyrylyp otyr.

«Aýsyl aýrýyna qarsy vaktsına 1 mln 384,4 myń bas iri qara malǵa, 6 mln 86,4 myń bas usaq malǵa egilip, 2002 jyldan beri aýsyl aýrýy tirkelmegen. Al 1 mln 201,6 myń bas iri qara malǵa, 5 mln 456,6 myń bas usaq malǵa, 302,9 myń bas jylqyǵa, 25,2 myń bas túıege túıneme aýrýyna qarsy ekpe jasaldy. Oblys aýmaǵynda 2003 jyldan beri janýarlar arasynda túıneme aýrýy tirkelmedi», - dedi Nurbek Baqtybaıuly.

Sonymen qatar, saryp aýrýyna qarsy janýarlar arasynda dıagnostıkalyq zertteýler jalpy 3 mln 377,7 myń bas malǵa júrgizildi. Nátıjesinde 389 bas iri qara mal, 532 bas usaq mal arnaıy orynda soıylyp, zalalsyzdandyryldy. Mal ıelerine jalpy 100 mln 570,2 myń teńge ótemaqy tólendi.

Saryp aýrýymen adamdar arasynda aýrýshańdyq 37 adamǵa kemise, adamdardy kene shaǵý 333 adamǵa azaıǵan.

Oblysta mal óleksesin tastaıtyn 257 oryn bar. Sonymen qatar, 14 ınsınerator peshi bar.

Budan ózge, qutyrý aýrýyna qarsy 187,5 myń ıtke, 32,8 myń mysyqqa vaktsına egilgen. Qutyrý aýrýynyń aldyn alý maqsatynda búgingi tańda 55 362 qańǵybas ıt-mysyq aýlanyp, kózi joıylǵan.