Túrkistan oblysynda vaktsına qujatyn jasady degen kúdikpen aýrýhana qyzmetkerleri ustaldy

TÚRKІSTAN. QazAqparat - Túrkistan oblysynyń polıtseıleri jalǵan vaktsına qujatyn jasady degen kúdikpen 2 aýrýhana qyzmetkerin anyqtady, dep habarlaıdy QazAqparat Túrkistan oblysynyń Polıtsııa departamentiń baspasóz qyzmetine silteme jasap.

Qazyǵurt aýdany polıtsııa bólimi kezekshisine belgisiz azamattan shuǵyl habar kelip túsken. Onda Qazyǵurt aýdanynda 3 birdeı turǵynnyń vaktsınanyń jalǵan qujatyn jasatqandyqtary aıtylǵan.

Habar jete salyp, polıtsııa qyzmetkerleri jan-jaqty tekserý jumystaryn júrgizdi. Tártip saqshylarynyń tarapynan júrgizilgen jedel-izdestirý is-sharalarynyń barysynda qyzmet múmkindigin negizsiz paıdalaný arqyly tólqujattardy qoldan jasaýmen jáne ótkizýmen aınalysqan degen kúdikpen Qazyǵurt aýdandyq aýrýhanasynyń 2 qyzmetkeri anyqtaldy.

Qazirgi tańda atalǵan jaıt QK 385-baby, ıaǵnı «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» qylmystyq quqyq buzýshylyǵy boıynsha sotqa deıingi tergeý amaldary júrgizilýde.

Aýdan polıtseıleriniń anyqtaýy boıynsha medıtsına qyzmetkerleri 3 turǵynǵa jalǵan qujat jasaǵan. Qazirgi tańda oqıǵanyń tolyq mán-jaıy anyqtalýda.

Óz kezeginde Túrkistan oblysynyń polıtsııa qyzmetkerleri azamattarǵa zańǵa qaıshy keletin áreketter úshin zańmen qylmystyq jaýapkershilik qarastyrylǵanyn eske salady.