Túrkistan oblysynda úsh jasar búldirshindi qutqarǵan jasóspirim marapattaldy

TÚRKІSTAN. QazAqparat – Túrkistan oblysynda sýǵa batqan úsh jasar búldirshindi qutqarǵan jasóspirim marapattaldy. Oblys ákimi Darhan Satybaldy batyr balany qabyldap, baǵaly syılyqpen marapattady, dep habarlaıdy QazAqparat tilshisi.

Kúni keshe Maqtaaral aýdanyna qarasty Jambyl aýyldyq okrýginde bolǵan oqıǵanyń vıdeosy áleýmettik jelide tarap ketti. Kópshilik segizinshi synyp oqýshysy Nurkeldi Nurpolattyń batyl ári jyldam áreketine dán rıza bolyp, alǵysyn jaýdyrǵan edi.

Kózsiz erlik kórsetken balaǵa aımaq basshysy da rızashylyǵyn jetkizdi.

«Kishkentaı balany sýdan qutqaryp alǵanyńdy aqparat quraldary men áleýmettik jeliden kórip, súısindik. Attyń ústinde úlken jigit sııaqty kórindiń. Biraq oqýshy ekensiń. Osy erligiń úshin saǵan jáne ózińdeı patrıot uldy tárbıelegen ata-anańa alǵysymdy aıtamyn. Jaraısyń!», – dedi Darhan Satybaldy.

Oblys ákimi sondaı-aq, Nurkeldige Alǵys hat pen noýtbýk syıǵa tartty.

Óz kezeginde oqýshynyń ákesi arnaıy kóńil bólip, qurmet kórsetken óńir basshysyna rahmet aıtty.

Eske sala keteıik, Nurkeldi Nurpolat 4 naýryz kúni saǵat 11:30 shamasynda kanalda aǵyp bara jatqan kishkentaı balany baıqap qalǵan edi.

Oılanbastan atynan sekirip túsip, balany sýdan alyp shyǵady. Es-tússiz jatqan balaǵa turǵyndar alǵashqy kómek kórsetip, aman alyp qaldy.

Ony teksergen dárigerler jaǵdaıynyń jaqsy ekenin aıtqan bolatyn.