Túrkistan oblysynda túrli jazataıym oqıǵalardan 36 bala qaıtys bolǵan

TÚRKІSTAN. QazAqparat – Túrkistan oblysynda balalardyń jazataıym jaǵdaılarǵa ushyraýy jıilep ketken. Oblystyq prokýratýranyń málimetinshe, jyl basynan beri óńirde osyndaı 50-den asa oqıǵa tirkeldi, dep habarlaıdy QazAqparat tilshisi.

Prokýrorlardyń málimetinshe, jol-kólik oqıǵalary men sýǵa batý, káriz shuńqyryna túsip ketý men kúıik shalý jaıttary kóbeıgen. Sondaı-aq, órt shyǵý men ıt tisteý derekteri de bar. Balalardyń tokqa túsýi, bıik ǵımarattardan qulaýy sııaqty oqıǵalar da boldy. Sonyń saldarynan 36 bala kóz jumyp, ondaǵany túrli dene jaraqattaryn aldy. Qadaǵalaýshy organ ókilderi mundaı jaǵdaılardyń negizgi sebepteri ata-analardyń jaýapsyzdyǵy ekendigin aıtady. Osy oraıda, balalaryn qaraýsyz qaldyrǵan ata-analar men jumysyna jaýapsyz qaraǵan birqatar ýákiletti organ ókilderi jazalanǵan.

«Jaýapsyz áreketteri úshin jyl basynan beri 90-nan astam ata-ana ákimshilik jaýapkershilikke tartyldy. Sonymen qatar, oblys prokýratýrasy taldaý júrgizý nátıjesinde 5 zań buzýshylyqty joıý negizinde usynym engizip, 10-ǵa jýyq laýazymdy tulǵa tártiptik jaýapkershilikke tartyldy», - dedi oblystyq prokýratýranyń basqarma prokýrory Dýlat Áshirbekov.