Túrkistan oblysynda «Túrkistannyń rýhanı kerýeni» sharasy júzege asyrylýda

TÚRKІSTAN. QazAqparat - Túrkistanda oblystyq qoǵamdyq damý basqarmasynyń uıymdastyrýymen «Túrkistannyń rýxanı kerýeni» taqyrybynda brıfıng ótti, dep habarlaıdy QazAqparat Túrkistan oblystyq óńirlik kommýnıkatsııalar qyzmetine silteme jasap.

Brıfıngtiń basty maqsaty - oblys turǵyndarynyń mádenı jáne patrıottyq sezimderin qalyptastyrý, destrýktıvti dinı aǵym jaqtastaryn Qazaqstandyq qoǵam qundylyqtaryna beıimdeý, memleket pen din ara qatynasyndaǵy zaıyrlylyq ustanymy boıynsha oblys turǵyndaryn aqparattandyrý.

Sharany júrgizgen oblystyq qoǵamdyq damý basqarmasy basshysynyń orynbasary Qaırat Abýov tuńǵysh ret qolǵa alynǵan jobaǵa toqtaldy.

«Elbasynyń «Bolashaqqa baǵdar: Rýhanı jańǵyrý» baǵdarlamalyq maqalasy aıasynda oblystyq qoǵamdyq damý basqarmasy uıymdastyrǵan «Túrkistannyń rýhanı kerýeni» taqyrybyndaǵy kezdesý 27 qarasha kúni birqatar qala, aýdandarda, 28 qarasha kúni Túrkistan qalasyndaǵy Qoja Ahmet ıAssaýı atyndaǵy halyqaralyq qazaq-túrik ýnıversıtetinde ótkizýdi josparlap otyrmyz»,- dep atap ótti.

Kezdesýdiń basty qonaqtarynyń qatarynan respýblıkaǵa tanymal sportshylar men óńirimizden shyqqan óner juldyzdary tabyldy. Olar atalǵan rýhanı kerýenniń kóshin bastap, oblysymyzdyń barlyq aýdan turǵyndarymen kezdesý uıymdastyrmaq.

Brıfıng barysynda erkin kúresten Qazaqstannyń 4 dúrkin chempıony, London Olımpıadasynyń júldegeri Aqjúrek Tańatarov, Mıanmada ótken Álem chempıonatynyń qola júldegeri Birjan Jaqypov, «Qazaqstan barysy» Jumanazar Ersultanov sóz sóılep, atalǵan sharanyń jastar men oblys turǵyndary úshin mańyzdylyǵyna toqtaldy.

«Jańa joba aıasynda biz aýdan qaladaǵy jastarmen kezdesemiz. Ózimizdiń aǵalyq aqylymyzdy aıtyp, balalardy durys jolǵa baǵyttaımyz. Bul kezdesýler sońynda ár aýyldan 4-5 sportqa áýes jas shyqsa bizdiń nátıjemiz osy dep bilemin»,- dedi Aqjúrek Tańatarov.

Sondaı-aq brıfıngte respýblıkaǵa tanymal sportshylar BAQ ókilderiniń suraqtaryna jaýap berip, tushymdy pikir almasty.