Túrkistan oblysynda «Turkestan Open Media» atty jýrnalıster forýmy ótti

TÚRKІSTAN. QazAqparat – Túrkistan oblysynda «Turkestan Open Media» jýrnalıster forýmy ótti. Jýrnalıster odaǵynyń oblystyq fılıaly uıymdastyrǵan sharada «Pandemııa tusyndaǵy ınfodemııanyń búgini jáne erteńi» taqyryby talqylandy, dep habarlaıdy QazAqparat tilshisi.

Onlaın formatta ótken konferentsııaǵa Nur-Sultan, Almaty, Shymkent qalalarynan jáne Túrkistan, Jambyl oblystarynan qalamy júırik jýrnalıster men medıtsına salasynyń mamandary qatysty.

Forýmǵa qatysýshylar pandemııa qaýpiniń áseri men onyń taralý jaǵdaıyn, qarapaıym qaýymǵa jetip jatqan aqparattardyń ózektiligin jan-jaqty talqylady. Sebebi, búginde áleýmettik jelilerdi paıdalanýshylardyń kóptigi men suranystyń qajettiligi aıasynda aqparattar da tez taralyp jatyr.

Onyń ishinde jeldeı esken jalǵan aqparattar kóbeıgeni jasyryn emes. Jýrnalıster aqparattar osylaı taraı berse, onyń qoǵamǵa paıdasynan zııany kóp eken degen pikirlerin jetkizdi. Onsyz da órship turǵan indetti tizgindeý qıynǵa soǵýy m.mkin ekenin atap ótti.

Bul máselege oraı oblystyń bas memlekettik sanıtar dárigeri Nurbek Nyshanov naqty aqparat halyqqa durys jetpeı, burmalanyp jatatyny jıi kezdesetinin atap ótti.

Al, Jýrnalıster odaǵynyń oblystyq fılıalynyń tóraǵasy Ǵalymjan Elshibaı indettiń adamdar ómirin jalmap, memleketterdiń ekonomıkasy men medıanaryqqa da áseri orasan ekeni týraly oıyn ortaǵa saldy.

«Álemniń kóptegen elderindegi aqparat quraldary úlken qıyndyqqa tap bolyp jatyr. Úsh aıdan beri karantın rejıminde jumys istep kele jatyrmyz. Al osyndaı shekteý kezeńi qashanǵa deıin sozylady? Karantın taǵy úsh aıǵa, alty aıǵa, 1-2 jylǵa sozylsa gazet-jýrnaldardyń, telearnalardyń jaı-kúıi ne bolmaq?»,- dedi Ǵalymjan Elshibaı.

Onlaın ótken forýmda sondaı-aq QR Parlamenti májilisiniń depýtat Darhan Myńbaı men oblystyq qoǵamdyq densaýlyq basqarmasynyń basshysy Marat Pashımovtar da óz oıyn ortaǵa saldy.

Jýrnalıst Juldyz Ábildá «Tekserilmegen aqparat jáne jýrnalıst jaýapkershiligi» taqyrybynda baıandama jasap, Jambyl oblystyq «Aqjol» gazetiniń bólim meńgerýshisi Marjan Raqaı da usynystaryn jetkizdi.

Qoǵamda ózekti bolǵan máselelerdi jýrnalıster men medıtsına salasy mamandary birlese otyryp talqylap, shynaıy aqparat tartýdyń ózektiligine toqtaldy. Ataýly shara sońynda alda kele jatqan jýrnalısterdiń tól merekesine oraı QR Jýrnalıster odaǵy basqarma tóraǵasy jáne oblystyq fılıaly tóraǵasy atynan úzdikter marapattaldy.

Odaqqa jańadan jýrnalıster qabyldandy.