Túrkistan oblysynda «TURANSEZ» arnaıy ekonomıkalyq aımaǵy qurylady

YSTANBUL. QazAqparat - Qazaqstanda túrkitildes elderdi biriktiretin «TURANSEZ» arnaıy ekonomıkalyq aımaǵy qurylatyny týraly QR Ulttyq ekonomıka mınıstri Áset Erǵalıev Túrkııa jáne túrkitildes elder arasynda ótkizilgen «Táýelsizdiktiń 30 jyldyǵyndaǵy ortaq kózqaras» atty saýda-ekonomıkalyq yntymaqtastyq jónindegi konferentsııada habarlady, dep habarlaıdy QazAqparat.

Vedomstvo baspasóz qyzmetiniń málimetinshe, mınıstr Túrkistandaǵy arnaıy ekonomıkalyq aımaq 2020 jyly Memleket basshysynyń Túrkitildes memleketterdiń yntymaqtastyq keńesiniń beıresmı sammıtinde bergen tapsyrmasy boıynsha qurylatynyn atap kórsetti.

«Túrkistan oblysynyń aýmaǵyndaǵy «TURANSEZ» AÓK ónimin óńdeý, mashına jasaý, elektr jabdyǵyn óndirý, týrıstik jáne bilim berý klasterlerinen turatyn ónerkásiptik-óndiristik klaster qurýdy, sondaı-aq ózara tıimdi saýda qatynastaryna járdemdesýdi kózdeıdi», - dedi Áset Erǵalıev.

Mınıstr Táýelsizdiktiń 30 jyly ishinde Qazaqstanǵa $380 mlrd tikeleı sheteldik ınvestıtsııa tartylǵanyn, bul Ortalyq Azııa óńirine salynǵan ınvestıtsııanyń jalpy aǵynynyń 70% ekenin atap ótti. Bul rette pandemııa álemniń barlyq elderiniń saýda-ekonomıkalyq baılanysyna, ulttyq ekonomıkanyń damýyn birqatar ózgertken.

Qazirgi ýaqytta Qazaqstan ekonomıkasy qalpyna kelý traektorııasynda tur. 10 aıdyń qorytyndysy boıynsha JІÓ ósimi 3,5% boldy. Jyl qorytyndysy boıynsha ósim 4%-ǵa jetedi dep boljanǵan.

Áset Erǵalıev Qazaqstandaǵy ınvestıtsııalyq ahýaldy jaqsartý sharalary týraly egjeı-tegjeıli baıandady. Premer-Mınıstrdiń basshylyǵymen Sheteldik ınvestıtsııalardy tartý jónindegi úılestirý keńesi jumys isteýde. Ol ınvestıtsııa jobalaryn iske asyrý protsesinde týyndaıtyn máselelerdi qarap, naqty sheshimder ázirleıdi.

«Bizdiń elimiz edáýir jaıly salyqtyq yntalandyrýlardy usynýda. EO jáne EYDU elderimen salystyrǵanda salyq jáne áleýmettik alymnyń mólsherlemesi 10%-dan tómen», - dedi ol.

Basym salalardaǵy ınvestorlar korporatıvtik jáne jer salyǵynan 10 jylǵa, múlik salyǵynan 8 jylǵa bosatylǵan.

Budan basqa, Nur-Sultanda «Astana» halyqaralyq qarjy ortalyǵy jumys isteıdi. Onyń jumysy aǵylshyn quqyǵyna negizdelgen ári elimizge múlde qaýipsiz ınvestıtsııa salý úshin jaǵdaı jasaýda. Shanhaı qor bırjasymen NASDAQ-pen birlesip, AHQO iske qosyldy.

Ortalyq aýmaǵynda nóldik korporatıvtik jáne jeke tabys salyq mólsherlemesi bar qolaıly salyq rejimi, sondaı-aq ońaılatylǵan vızalyq rejim áreket etedi.

Qoldaýdyń jańa quraly – árbir ınvestorǵa jeke qoldaý sharalaryn usynatyn Investıtsııalar týraly kelisim zań júzinde engizildi.

«Elimizde ınvestorlar úshin edáýir qolaıly sharttar jasalǵanyn atap óteıin. Túrki memleketterindegi áriptesterime Qazaqstanda joǵary tehnologııalyq, onyń ishinde halyq sany 180 mln-nan asatyn EAEO elderiniń naryǵyna baǵyttalǵan birlesken kásiporyndar qurýǵa shaqyramyn», - dedi Áset Erǵalıev.