Túrkistan oblysynda tumaýǵa shaldyqqandar sany 7 ese artty

TÚRKІSTAN. QazAqparat - Túrkistan oblysynda koronavırýs ınfektsııasyna qatysty ahýal turaqty, al tumaýmen syrqattanýshylar sany kerisinshe, artyp otyr. Bul týraly oblystyq sanıtarııalyq-epıdemıologııalyq baqylaý departamenti basshysynyń orynbasary Bahtyoraz Elemesov málim etti, dep habarlaıdy QazAqparat tilshisi.

Óńirde ınfektsııalyq aýrýlardyń maýsymdyq ósýi baıqalǵanyn aıtqan sanıtar mamandar turǵyndardy saqtyq sharalaryn ustanýǵa shaqyryp otyr. Sondaı-aq adamdar kóp jınalatyn jerlerde betperde taǵyp, profılaktıkalyq ekpe saldyrý qajettigin eskertýde.

«Qazirgi tańda oblysta JRVI jáne tumaýmen syrqattanýdyń maýsymdyq ósýi baıqalady. Epıdmaýsym bastalǵannan beri JRVI-diń 2 723 jaǵdaıy tirkeldi. Al jyl basynan 6 myńnan astam adam JRVI juqtyrǵan. Tumaý ınfektsııasy boıynsha maýsymdyq 56 jaǵdaı tirkeldi. 2021 jyldyń osy kezeńimen salystyrǵanda 7 ese artyp otyr. Al koronavırýs ınfektsııasy boıynsha epıdemıologııalyq jaǵdaı turaqty», - dedi Bahtyoraz Elemesov.

Túrkistan oblysy qoǵamdyq densaýlyq basqarmasy basshysynyń orynbasary Saltanat Jabaǵıevanyń aıtýynsha, óńirdiń medıtsına uıymdarynda dárilik zattardyń rezervtik qory jasaqtalǵan. Olardyń arasynda vırýsty ınfektsııalarǵa qarsy qoldanylatyn Oseltamavır, Ýlkarıl, Ibýprofen, Paratsetamol sekildi dári-dármekter bar.

Aıta keteıik, qazirgi tańda JRVI-diń aldyn alý úshin árbir medıtsına uıymdarynda jospar túzilip, mobıldi toptar qurylǵan. Dárigerler halyqqa tumaýdan saqtaný jumystaryn turaqty túrde túsindirip keledi.