Túrkistan oblysynda toıhanalar sport keshenine aınalýda

TÚRKІSTAN. QazAqparat - Túrkistan oblysynda toıhanalar sport ortalyqtaryna aınalýda, dep habarlaıdy QazAqparat tilshisi.

Arys qalasynda toıhana ıeleri kásiptik baǵytyn aýystyryp, qyzmetin basqa salaǵa beıimdep jatyr.

Qýantarlyǵy, onyń biri múmkindigi shekteýli jandarǵa arnalǵan áleýmettik salaǵa baǵyttalsa, endi biri jastardy olımpıadalyq sport túrlerine daıyndaıtyn ortalyqqa aınalýda.

Máselen, Arys qalasynyń irgesinde ornalasqan Aqdala aýyldyq okrýginde burynǵy 500 oryndyq saltanat saraıy 1200 balany qabyldaýǵa qaýqarly sporttyq baǵyttaǵy ǵımarat bolyp aýysqaly jatyr.

Sanaýly kúnnen keıin iske qosylatyn sport ortalyǵynda boks, dzıýdo, qazaq kúresi men bı úıirmesi jumys isteıtin bolady.

Jasóspirimderdiń tegin jattyǵatyn ortalyǵyna tájirıbeli mamandar jan-jaqtan arnaıy shaqyrtylǵan.

Jastardyń shynyǵyp, shymyr bolýyna jaǵdaı jasaǵan jas kásipker Álibek Quralbek «tabystan góri týǵan jerdi túletýge qumarttym» deıdi.

Jalpy búginde Arys qalasynda ornalasqan 18 toıhana bar bolsa, qazirgi kezde sonyń 5-eýi nysanaly maqsatyn aýystyryp, áleýmettik baǵytta el ıgiligine qyzmet etýde.

Bul ıgilikti iske uıytqy bolǵan kásipkerler memlekettik baǵdarlamanyń arqasynda qarjylandyrylady.

Sondyqtan turǵyndar úshin barlyǵy tegin.

Tek ǵımaratty óz aqshasyna suranysqa saı jabdyqtap, talapqa saı beıimdeýi kerek.

Aıta keteıik, Arysta buǵan deıin de bir toıhana «Teń qoǵam» áleýmettik ortalyǵy bolyp beıimdelgen bolatyn.

Munda múmkindigi shekteýli azamattar úshin bos ýaqytyn tıimdi úılestirýge jaǵdaı jasalǵan.

Aptasyna bes kún jumys isteıtin nysanda ústel tennısi, jattyǵý zaly men oı-óristi damytýǵa arnalǵan túrli jabdyqtar qoıylǵan.

Tipti, tájırıbeli mamannyń massajy men kitaphanasy da bar.

Munda qyzmetke qabyldanǵan jumysshylar da múmkindigi shekteýli jandardan quralǵan.