Túrkistan oblysynda tóbesi jabyq bazarlar demalys kúnderi jumys istemeıdi
Bul týraly Túrkistan oblysynyń sanıtarııalyq-epıdemıologııalyq baqylaý departamenti basshysynyń orynbasary Asqar Ysqaqov brıfıngte málimdedi.
Oblystyń bas sanıtarııa dárigeriniń qaýlysy boıynsha, epıdemıologııalyq jaǵdaı turaqtalǵanǵa deıin oblys aýmaǵynda karantın men shekteý sharalary qatańdatylady.
«Qaýly negizinde buqaralyq jáne otbasylyq, sondaı-aq, kópshilik jınalatyn ózgede is-sharalardy, onyń ishinde turǵylyqty meken jaıy boıynsha (úıde) ótkizýge tyıym salynady. Oıyn-saýyq nysandarynyń (túngi oıyn klýbtary, karaoke, býkmeker keńseler, jabyq úı jaılardaǵy balalar oıyn alańdary, batýt men attraktsıondar) qyzmeti ýaqytsha toqtaıdy. «Ashyq» jobasyna qatyspaǵan nysandar: mádenıet úıleri, teatrlar, kınoteatrlar, kontsert zaldary, fılarmonııalar, oblysaralyq turaqty emes (týrıstik) tasymaldar, aýdandyq, qalalyq turaqty emes (týrıstik) tasymaldar, bılıard, kompıýterlik klýbtar boýlıng, tsırkter, banket zaldary qyzmetine tyıym salynady», - dedi Asqar Ysqaqov.
Sanıtarııalyq-epıdemıologııalyq talaptardy jáne kúsheıtilgen dezınfektsııalyq rejımdi saqtaı otyryp, kelesi obektilerdiń qyzmetine ruqsat etiledi: saýda nysandarynyń, onyń ishinde pisirilgen ónimderdi, fastfýdty, jumsaq balmuzdaqty, sýsyndardy satý dúńgirshekteriniń qyzmeti kúsheıtilgen sanıtarııalyq-dezınfektsııalyq rejımmen saǵat 09.00-den 22.00-ge deıin; qyzmet kórsetý salasynyń qyzmetkerleri, kvazımemlekettik sektor organdary, ulttyq kompanııalar, vahtalyq qyzmetkerler, iri uıymdasqan ujymdarda shtattyq kestege sáıkes, qyzmetkerlerdiń keminde 80% - qashyqtan, al 20% kúndizgi rejımde jumys atqarady.
COVID-19-ǵa qarsy tolyq vaktsınatsııa kýrsyn alǵan jáne sońǵy 3 aıda COVID-19 aýrýyna shaldyqqan barlyq qyzmetkerlerge mekemede jumys atqarýǵa ruqsat etiledi.