Túrkistan oblysynda «Táýelsizdik qarlyǵashtary» atty baıqaý qorytyndysy jarııalandy
Túrkistan oblysy men Shymkent qalasynyń 30 jasqa deıingi jas qalamgerleri qatysqan baıqaýǵa 100-den asa usynys kelip tústi, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Úmitkerlerdiń shyǵarmalaryn jazýshy, Halyqaralyq «Alash», «Túrki álemine qyzmet» syılyqtarynyń ıegeri Marhabat Baıǵut bastaǵan óńirimizdiń tanymal aqyn-jazýshylary men aqparat salasynyń ókilderi saraptap, laıyqty baǵasyn berdi.
Qazylar alqasynyń sheshimimen shyǵarmalary úzdik dep tanylǵan 12 jas qalamger Túrkistan qalasyndaǵy «Vızıt ortalyqta» uıymdastyrylǵan baıqaýdyń marapattaý rásimine qatysyp, qarjylaı syılyqtarmen marapattaldy.
Sonymen qatar, atalmysh sharaǵa qoǵamdyq damý basqarmasynyń basshysy Damır Júnisov, «Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaev, Qazaqstan jazýshylar odaǵy Túrkistan oblystyq fılıalynyń tóraǵasy Álibek Shegebaı, Qazaqstan jýrnalıster odaǵy Túrkistan oblystyq fılıalynyń tóraǵasy Ǵalymjan Elshibaı jáne zııaly qaýym men BAQ ókilderi qatysty.
Atalmysh sharany ashyp bergen qoǵamdyq damý basqarmasynyń basshysy Damır Júnisov: «Táýelsizdigimizdiń 30 jyldyǵy aıasyndaǵy sharalardyń bastamasy retinde uıymdastyrylǵan bul baıqaýdyń mańyzy óte zor. Sebebi, bizdiń Táýelsizdikke jetý jolyndaǵy san qıly tarıhymyzdy túletip, 30 jyl aıasynda elimizdiń jetken jarqyn jetistikterin nasıhattaý qolyna qalam ustaǵan aqyn-jazýshylar men jýrnalısterdiń eńbegi arqyly júzege asady. 30 jyldyqqa arnalǵan baıqaýǵa 30 jasqa deıingi qalamgerlerdi qatystyrýdaǵy basty maqsatymyz – Táýelsizdiktiń qadirin uǵyndyrýdy osy jyldarda týǵan jastardyń qalamynyń qýaty arqyly sezindirý, uǵyndyrý. 100-den asa júırik jastardyń arasynan shyǵarmalary ozyq dep tanylǵan barsha qalamgerlerdi quttyqtaımyn!. Bul baǵyttaǵy sharalar men baıqaýlar jalǵasyn tabatyn bolady», dep baıqaýǵa túsken týyndylardyń jeke jınaq bolyp shyǵatyndyǵyn habarlady.
Jıynda qazylar alqasynyń músheleri Ǵalymjan Elshibaı, Álibek Shegebaı, Ertaı Bekqul, Baltabek Túıetaev qatysýshy úmtikerlerdiń shyǵarmalaryna taldaý jasap, jeńiske jetken týyndylardyń ozyq tustaryn atap ótti.
«Táýelsizdik qarlyǵashtary» baıqaýynyń pýblıtsıstıka janry boıynsha júldeli І - oryndy Marııa Sáýlebekqyzy ıelense, ІІ - oryn ıegeri Ǵalııa Bıseıit, ІІІ-oryn Áben Zaǵıpa marapattaldy. Yntalandyrý syılyǵymen Aıman Qadir, Maftýna Najıeva, Jeńis Nurdáýletter marapattaldy.
Sonymen qatar, baıqaýdyń poezııa jáne proza janry boıynsha júldeli І - oryn Álimjan Álisher marapattalsa, ІІ oryn Erdáýlet Aınabekuly, ІІ oryn Núrken Nurǵazylar arnaıy dıplommen marapattaldy. Yntalandyrý syılyǵy Meıir Serikuly, Elaman Tóleýtaı, Sezim Mergenbaıǵa tabystaldy.
Marapattaý sharasy baıqaý jeńimpazdarynyń «Tuńǵysh Prezıdent» saıabaǵyndaǵy arnaıy oryndarǵa tal egý rásimimen jalǵasyn tapty.