Túrkistan oblysynda tasqyn sý kólikterdi jol ústinen aǵyzyp jiberdi
«Sholaqqorǵan – Shaıan» jolynda tasqyn sý nópiri «Toyota Camry» kóligin joldan shyǵaryp jibergen. Kóliktegi eki adam der kezinde qutqaryldy.
Dál osyndaı jaǵdaı Arys qalasynda da bolǵan. Munda sý ortasynda qalǵan «Nıva» kóliginen 5 jolaýshy qaýipsiz jerge evakýatsııalandy.
Eske salaıyq, keshe Báıdibek aýdanyndaǵy «Shaıan – Myńbulaq» oblystyq mańyzy bar avtojolymen kele jatqan «VAZ-2106» kóligin tasqyn sý aǵyzyp áketken edi. Avtokólik ishinde 39 jastaǵy er adam, 33 jastaǵy júkti áıel men 7 jasar bala bolǵan. Olar túgelimen derlik sý astynda qalǵan mashınanyń ústine shyǵyp, aman qaldy. Turǵyndardy qutqarýǵa umtylǵandar arasynda bolǵan Myńbulaq aýyldyq okrýginiń ákimi Ǵalymjan Ákimbaev júkti áıel men balany beline arqan baılap sýdan alyp shyqty.
2 aqpanda Túrkistan oblysynyń birneshe aýdanyn sý basqan bolatyn. Adamdar evakýatsııalanyp, óńirge Tótenshe jaǵdaılar mınıstri ıÝrıı Ilın ushyp shyqty.
Saýran aýdanynda mektep oqýshylary onlaın oqýǵa kóshti. Sondaı-aq osy aýdanda 7 balabaqsha jumysyn toqtatty. Túrkistan oblysynyń ákimi Darhan Satybaldy sý kirgen eldi meken turǵyndarymen kezdesti.
Búgin málim etilgendeı, Saýran aýdanynyń evakýatsııalanǵan turǵyndary úılerine orala bastady. Tótenshe jaǵdaılar mınıstri ıÝrıı Ilın atalǵan aýdanda tótenshe jaǵdaı jarııalanýy múmkin ekenin aıtty.
Sondaı-aq Tótenshe jaǵdaılar birinshi vıtse-mınıstri Ibragım Kúlshimbaev Ortalyq kommýnıkatsııalar qyzmetinde ótken brıfıngide Túrkistan oblysyndaǵy sý tasqynyna qatysty sońǵy málimetterdi jarııalady.
«Qazir respýblıkanyń ońtústik óńirlerinde, onyń ishinde Túrkistan oblysynda sý tasqyny jaǵdaıy kúrdelene tústi. 1-2 aqpanda qatty jaýyn-shashyn men temperatýranyń 7-8 gradýsqa deıin kóterilýi nátıjesinde atalǵan oblystyń 4 aýdanyn taýdan erigen qar sýlary shaıa bastady. Atap aıtqanda, Saýran, Ordabasy, Sozaq jáne Báıdibek aýdanynyń aýmaǵy. Sondaı-aq Arys jáne Kentaý qalalary da bar. Saldarynan 21 eldi meken jáne 234 aýla aýmaǵy sý astynda qaldy», - dedi ol.
Vıdeodan alynǵan kadr