Túrkistan oblysynda «Tańǵajaıyp Túrkistan» baıqaýy jarııalandy
Basqosýda basqarma basshysy kópshilikti baıqaýdyń maqsatymen tanystyryp, oǵan bir kisideı qatysýǵa shaqyrdy. Beısenbaı Tájibaevtyń sózinshe, Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy «Qazaqstannyń kıeli jerleri geografııasy» baǵdarlamasyn júzege asyrý men týǵan jerdiń týrıstik áleýetin kóterip, tarıhyn nasıhattaý - basty sharttar. Baıqaýǵa aǵymdaǵy jyldyń 14 qyrkúıeginen 12 jeltoqsanǵa deıin jarııalanǵan materıaldar qabyldanady. Jeńimpazdar uıymdastyrýshylar tarapynan qurylǵan arnaıy komıssııanyń sheshimimen anyqtalady. Usynylǵan úzdik jumystar «Túrkistan jarshysy» feısbýk tobynda eń kóp daýys jınaǵany, eń kóp unatylǵany (laık), eń kóp bólisilgeni (repost) arqyly da baǵalanbaq. Jalpy júlde qory - 1350000 teńge.
«Tańǵajaıyp Túrkistan» baıqaýynda bas júlde, 1, 2 jáne 3-oryndar beriledi. Sondaı-aq yntalandyrý syılyqtary da taǵaıyndalǵan.
«Túrkistan oblysy qurylyp, shejireli shahardyń jańa dáýiri bastalǵanyn bilesizder. Endeshe, óńirimizdiń tylsym tarıhy men tańǵajaıyp tabıǵatyn nasıhattaýǵa, Túrkistandy shyn mánindegi Túrki álemine ortaq qalaǵa aınaldyrýǵa bárimiz atsalysýymyz kerek. Bul rette Qoja Ahmet ıAsaýı atyndaǵy halyqaralyq qazaq-túrik ýnıversıteti stýdentterine de mol múmkindik týyp tur. Osy oqý ornynda jýrnalıstıka mamandyǵy boıynsha 100-ge jýyq stýdent bilim alyp jatyr. Olardyń arasynda aǵylshyn jáne túrik tilinde tereń bilim alyp júrgenderi de bar eken. Demek, Túrkistan oblysy men Túrkistan qalasy týraly birneshe tilde maqala, túrli eńbekter jazyp, shetelge tanytýǵa bolady. Kez kelgen áleýmettik jeli belsendileri qatysa alady»,- dedi basqarma basshysy.
Jıyn barysynda sondaı-aq erikti jýrnalıster klýbyn qurý jaıy sóz boldy. Sol arqyly Túrkistannyń tarıhyn dáriptep, týrıstik tartymdylyǵyn arttyrýǵa jastar da óz úlesin qosa alady.
Aıta keteıik, qatysýshylar Facebook áleýmettik jelisinde Túrkistan oblysyndaǵy «Qazaqstannyń kıeli jerler geografııasyna» engen 24 nysan týraly post jarııalaýy qajet. Árbir qatysýshy kem degende 20 jazba jazýy tıis.
Ýnıversıtet kitaphanasynda ótken keleli basqosýda budan bólek oqý ornynyń «Rýhanı jańǵyrý» baǵdarlamasy boıynsha jetekshisi Ámirequl Ábýov pen áleýmettik ǵylymdar fakýltetiniń dekany Eftal Batmastyń, sondaı-aq «Týrızm jáne jýrnalıstıka» kafedrasynyń meńgerýshisi Bekjigit Serdáli men ózge de azamattardyń oı-pikirleri tyńdaldy. Jýrnalıstıka salasyndaǵy máseleler men izdenister jaıy aıtyldy. Stýdentter de osy máselelerge oraı óz usynystaryn jetkizip, Túrkistannyń jańa kelbetin qalyptastyrý bastamasyna belsene qatysatyndyqtaryn jetkizdi.