Túrkistan oblysynda soǵys ardagerlerine 1 mln teńgeden beriledi
Óńir ákimdiginiń baspasóz qyzmetinen málim etkendeı, Túrkistan oblysynda qazirgi ýaqytta Ekinshi dúnıejúzilik soǵysqa qatysqan 28 ardager turady.
«Jeńistiń 76 jyldyǵyn merekeleýge baılanysty olardyń árqaısysy 1 mln teńge kóleminde birjolǵy tólem alady. Sondaı-aq Ekinshi dúnıejúzilik soǵystyń qatysýshylary men múgedekterine teńestirilgen 214 tulǵaǵa birjolǵy materıaldyq tólem qarastyrylǵan», - dedi ákimdikten.
Jalpy, Túrkistan oblysy boıynsha 6808 ardagerge Jeńis merekesiniń qurmetine birrettik materıaldyq kómek tóleý úshin aýdandyq, qalalyq bıýdjet esebinen 233,2 mln teńge qarjy bólingen.
Maıdangerler tıisti kómekti 4 mamyrǵa deıin tolyq alatyn bolady. Onyń ishinde:
- Ekinshi dúnıejúzilik soǵysqa qatysqan 28 azamatqa jáne soǵys múgedekterine – 1 mln teńgeden;
- 6722 tyl eńbekkeri men qaza bolǵan jaýyngerlerdiń jesirlerine – 30 000 teńgeden;
- blokadalyq Lenıngradtyń 55 turǵynyna, soǵysta qaıtys bolǵandardyń jesirlerine – 60 000 teńgeden;
- tutqynda bolǵan kezde kámeletke tolmaǵan 3 azamatqa, soǵys qatysýshylaryna teńestirilgen basqa da sanattarǵa – 100 000 teńgeden belgilendi.
«Sonymen qatar, Túrkistan oblysynyń barlyq aýdan, qalalarynda oblys ákiminiń tapsyrmasyna sáıkes soǵys ardagerleriniń úılerine baryp, quttyqtaý sharalary júrgiziledi. Ardagerler uıymdarynyń tóraǵalarymen birlesip ótkiziletin shara barysynda karantın talaptary qatań saqtalady. Onda oblys ákimi Ómirzaq Shókeevtiń atynan ardagerlerge quttyqtaý tilegi jetkizilip, syı-qurmet kórsetiledi», - dep qosty vedomstvodan.
Búginde Túrkistan oblysynda soǵys ardagerleri turǵyn úımen tolyq qamtamasyz etilgen. Saýyqtyrý sharalaryn júrgizý maqsatynda 28 maıdanger úılerinde qajetti medıtsınalyq qyzmetti aldy. Dıspanserlik tekserýden ótkizildi.
«Sondaı-aq jyl saıyn oblystyń tarıhı jáne mádenı eskertkishteriniń tehnıkalyq jaǵdaıyna monıtorıng júrgizilip, tıisinshe jóndeý jáne abattandyrý jumystary júzege asyrylýda.
Oblys boıynsha 315 eskertkish, 78 memorıal, monýmenttik keshen bar. Búgingi tańda olardyń birqatary jańartylýda.
Jyl saıyn aǵa urpaq ókilderin saýyqtyrý maqsatynda 7,8 myń jekelegen sanattaǵy azamattar demalyp, emdeledi (Ardagerler úıinde – 4000 adam, «Meıir» ardagerler úıinde - soǵys ardagerleri men olarǵa teńestirilgender, zeınetkerler, barlyǵy 3800 adam)», - dedi Túrkistan oblysy ákiminiń baspasóz qyzmetinen.