Túrkistan oblysynda sheteldik kólikterdi tirkeý 5 jerde júrgiziledi
Túrkistan oblysy boıynsha sheteldik kólikterdi tirkeý Túrkistan qalasynda jáne Maqtaaral, Ordabasy, Saıram, Saryaǵash aýdandaryndaǵy mamandandyrylǵan HQO júrgiziledi. Sheteldik kólik ıesi alǵashqy tirkeý úshin 200 000 teńge, tehpasport úshin – 4 313 teńge jáne memlekettik nómir úshin – 9 660 teńge kóleminde memlekettik tólemderdi tóleıdi.
«Elimizde sheteldik kólikti zańdastyrý úshin kólik 2022 jyldyń 1 qyrkúıegine deıin elge ákelingen bolýy kerek. Sondaı-aq izdeýde bolmaýy qajet jáne ózge memlekette burynǵy tirkelgen jeri boıynsha esepten shyǵarylǵan bolýy tıis. Sheteldik kólikterdi tirkeý jumystary 2023 jyldyń 1 shildesine deıin jalǵasady», - dedi Baǵlanbek Aıtpaev.
Brıfıngke qatysqan Túrkistan oblysy polıtsııa departamenti ákimshilik polıtsııa basqarmasynyń bastyǵy Almas Tastanbekovtiń aıtýynsha, alǵashqy tirkeýge jatatyn sheteldik avtokólikterdiń jylyna jáne ekologııalyq klasyna talaptar qoıylmaıdy. «Zańdastyrýǵa ótinishti «Elektrondyq úkimet» portaly arqyly nemese arnaıy mamandandyrylǵan HQO-ǵa berýge bolady. Onda arnaıy sektorlar uıymdastyrylady, olar tek sheteldik avtokólikterdi zańdastyrýǵa qajetti qujattardy qabyldaıdy. Ótinish pen qujattardy tapsyrǵannan keıin kólikti mamandandyrylǵan HQO-nyń tekserý pýnktine nómirlik agregattardy salystyrý úshin kirgizedi. Tekserýden ótkennen keıin 2 kún ishinde kólikti zańdastyrýǵa bolatyny nemese bolmaıtyny jóninde sheshim shyǵarylady», - dedi Almas Tastanbekov.
Aıta keteıik, Reseı Federatsııasynan elge kelgen 300 myńǵa jýyq kóliktiń 12 myńnan astamy Túrkistan oblysynda júr. Sondaı-aq óńirde Armenııalyq 500-den astam kólik bar.