Túrkistan oblysynda sheneýnikter qyzmettik kólikti jumystan tys maqsatta paıdalanǵan
Máselen, Otyrar aýdany ákiminiń orynbasary ózine tapsyrylǵan qyzmettik avtokólikti jumystan tys maqsatta paıdalanýyna jol berilgendigi anyqtaldy. Osyǵan oraı, sheneýnikke Ádep jónindegi keńes sheshimimen «qatań sógis» túrindegi jaza qoldaný usynyldy. Sonymen qatar, Ádep kodeksiniń talaptaryn saqtamaı, azamatpen sóılesý barysynda dórekilik tanytqany úshin Saıram aýdany Kólkent aýyldyq okrýginiń ákimine je osyndaı jaza qoldaný usynyldy. Al, Jetisaı aýdanynyń Maqtaly aýyldyq okrýginiń ákimi qaramaǵyndaǵy qyzmetkerdiń eńbekke ýaqytsha jaramsyz paraǵynda bolǵandyǵyna qaramastan, jumys ýaqytyn esepteý tabeline jumysta ekendigi týraly belgi qoıyp jibergen. Atalǵan is-áreketi úshin sheneýniktiń qyzmetine tolyq sáıkes emestigi túrindegi jaza qoldaný usynyldy.
Sondaı-aq, memlekettik qyzmetshiler tarapynan qyzmettik ádep normasyn buzǵany úshin Shardara qalasynyń ákimine de «qatań sógis» berý usynyldy.
Budan bólek, atalǵan jıynda tótenshe jaǵdaı rejıminde kommýnaldyq qyzmetterdi tóleý boıynsha áleýmettik jaǵynan osal toptarǵa jatatyn 88 tutynýshynyń quqyǵy men zańdy múddesine iske asyrýyna kedergi keltirip, tıisti tólemaqynyń júrgizilýin qamtamasyz etpegen tıisti laýazymdy tulǵanyń tártiptik isi qaraldy. Túrkistan qalasy ákimdiginiń Infraqurylym jáne kommýnıkatsııalar bóliminiń basshysyna Ádep jónindegi keńes sheshimimen qyzmetine tolyq sáıkes emestigi túrindegi jaza qoldaný usynyldy.
Keńes otyrysynda Ordabasy jáne Saryaǵash aýdandarynyń jergilikti atqarýshy organy memlekettik qyzmetshileriniń ádep jónindegi ýákilderiniń qyzmettik ádeptiń saqtalýyn monıtorıngileýdi jáne baqylaýdy júzege asyrý kezindegi qyzmetiniń nátıjesi boıynsha esebi tyńdaldy.
Aıta keteıik, ótken jyly atalǵan keńes 65 tártiptik isti qarap, nátıjesinde 37 laýazymdy tulǵaǵa tártiptik jaza qoldanǵan.