Túrkistan oblysynda sharýalar men ǵalymdardyń basyn qosqan dala semınary ótti
«Sýarmaly tuzdanǵan topyraqtyń qunarlylyǵyn jáne júgeri daqylynyń ónimdiligin arttyrýda jańa ınnovatsııalyq tehnologııasyn qoldaný» atty semınarǵa aýdan basshylary men ǵalymdar, sala mamandary men sharýalar qatysty, dep habarlaıdy QazAqparat tilshisi.
Basqosýda sharýashylyqty ǵylymmen ushtastyra otyryp, mol ónim alýdyń tıimdi joldary men múmkindikteri keńinen talqylandy.
Oblystyń ár óńirinen kelgen sharýalar usynystaryn aıtyp, ózara tájirıbe almasty. Aýdan ákiminiń mindetin atqarýshy Ábdiǵalı Júnisov semınardyń sharýalar úshin mańyzy zor ekendigine toqtalyp, jańa ınnovatsııaǵa negizdelgen eńbektiń nátıjesi de joǵary bolatynyn tilge tıek etti.
Semınarda Ó.O.Ospanov atyndaǵy Qazaq topyraqtaný jáne agrohımııa ǵylymı zertteý ınstıtýtynyń bas dırektory, aýyl sharýashylyǵy ǵylymdarynyń doktory, professor, QR AShǴA akademıgi A.Saparov, aýdandyq aýyl sharýashylyǵy bóliminiń basshysy B.Syzdyq, aýyl sharýashylyǵy ǵylymdarynyń kandıdaty M.Ibraev, joǵaryda atalǵan ınstıtýttyń topyraq geografııasy, genezısi jáne ony baǵalaý bóliminiń meńgerýshisi K.Pachıkın, Tuzdanǵan topyraqtardy melıoratsııalaý bóliminiń meńgerýshisi M.Poshanov tájirıbelerimen bólisip, ǵylymǵa negizdelgen jobalardy tanystyrdy.
Jalpy Otyrar aýdanynda sharýalar 33 myń ga jerge túren salǵan bolsa, sonyń 11 myń gektardan astam jerine júgeri daqyldaryn ekken. Aýdandyq aýyl sharýashylyǵy bóliminiń málimetinshe jyldan-jylǵa júgeri daqylyn egýge nıet bildirgen sharýalardyń sany artyp keledi.