Túrkistan oblysynda shalǵaıdaǵy aýyldarda «aqyldy» jaryqshamdar iske qosyldy
«Túrkistan oblysyndaǵy Báıdibek aýdanynda baǵanalar ornatylyp, kósheleri jaryqtandyrylǵan eldi mekender sany artyp keledi. Búginde ondaǵy Borlysaı aýyldyq okrýgine qarasty Aqtas, Qoshqarata jáne Keńsaı eldi mekenderiniń kóshe shamdary jarqyrap, tún kórinisi tıisti talaptarǵa sáıkestendirildi», - delingen habarlamada.
Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy «Týǵan jer» baǵdarlamasynyń aıasynda qolǵa alynǵan sharaǵa bastamashy bolǵan báıdibektik azamat, «Qurmet» ordeniniń ıegeri, fılantrop - Oralbek Botbaı. Kásipker úsh aýyldyń boıyn jalǵaıtyn uzyndyǵy 14 shaqyrymnan (14,341 shq.) astam jolǵa 438 baǵana ornatyp, jaryq shamdaryn qosyp berdi.
Osynaý qýanyshty jaǵdaıǵa qatysqan oblys ákiminiń orynbasary Ulasbek Sádibekov quttyqtaý sóz sóılep, basqa qalada júrse de týǵan jerin umytpaı, Borlysaı aýyldyq okrýginiń áleýetin kóterýge óz úlesin qosyp júrgen O.Botbaıǵa oblys ákiminiń Alǵys hatyn tabys etip, ıyǵyna shapan japty.
Aýyl turǵyndarynyń atynan sóz alǵan Qoshqarata aýylynyń bıi, ardager-ustaz E.Qyryqbaev Oralbek Qojamjarulyna aýyl turǵyndarynyń alǵysyn jetkizdi.
Buǵan deıin de jerlesterin túrli ıgi isterimen qýantyp júrgen metsenat aldaǵy ýaqytta da týǵan jeri - Báıdibekti kórkeıtip, damytýda aıanbaıtynyn jetkizdi.
Jaryq shamdarynyń jalpy quny - 245 mln teńge. Kóshe shamdary 14 fýnktsııany qatar atqara alady. Máselen, uıaly telefondy qýattaý, wi-fi taratý, kóshedegi kólik qozǵalysyn beıne baqylaýǵa túsirý jáne t.b. syndy qyzmetteri bar. Sondaı-aq, taǵy bir erekshelik - bul kóshe shamdary qarańǵylyq pen jaryqty avtomatty túrde sezinip, kún raıyna qaraı qýat berý mólsherin ózdiginen rettep otyrady. Nátıjesinde 75% energııa qýaty únemdeletin bolady.
Kásipkerdiń demeýshiligi munymen toqtamaq emes. Dál qazirgi ýaqytta O.Botbaıdyń jetekshiligimen Báıdibek aýdanynyń ortalyǵy Shaıan aýylyndaǵy M.Áýezov kóshesinde uzyndyǵy 3 shaqyrymnan astam joldyń boıyna 77 baǵana ornatylyp, jaryq shamdarynyń qurylysy júrgizilýde.