Túrkistan oblysynda respýblıkalyq aqyndar aıtysy ótti

SAIRAM. QazAqparat - Túrkistan oblysy, Saıram aýdanynda «Máńgilik el jyrlaıdy» respýblıkalyq aqyndar aıtysy ótti. Jyr dodasy el Táýelsizdiginiń 30 jyldyǵyna oraı uıymdastyryldy, dep habarlaıdy QazAqparat tilshisi.

Ulttyń uly tulǵalary – Jambyl Jabaev, Álıhan Bókeıhanov, kúsh atasy Qajymuqan, sondaı-aq Dına Nurpeıisova, Ybyraı Altynsarınniń mereıli jyldaryn jyrǵa qosqan aqyndar aıtysty saǵynǵan kórermenin bir serpiltti. Táýelsizdiktiń qadir-qasıetin ulyqtap, el mereıin ústem etti.

Tańerteńnen bastalǵan retro aıtysta 4 jup óner kórsetip, alamannyń qorytyndysynda bas júldeni Túrkistannyń tarlany Bekarys Shoıbekov ıelendi. Birinshi oryn Serik Qalıevke buıyrsa, ekinshi oryndy Anar Japparqulova jeńip aldy. Al úshinshi oryndy Aıbek Qalıev mise tutty. Aıtystyń arnaıy júldeleri Kárıma Oralova, Aqmaral Leýbaeva, Marjan Esjanova, Bóribaı Orazymbetke berildi.

Qazylar alqasynyń tóraǵasy, jazýshy, «Alash» syılyǵynyń ıegeri Marhabat Baıǵut júreginen jyr tógip, halqyn qýantqan aqyndarǵa shynaıy alǵysyn bildirdi.