Túrkistan oblysynda Pfizer vaktsınasymen egilgender sany 7 myńnan asty

TÚRKІSTAN. QazAqparat - Túrkistan oblysynda koronavırýs ınfektsııasyna qarsy «Pfizer» ekpesin salý jumystary 15 qarashadan bastaldy. Búginge deıin 12-17 jas aralyǵyndaǵy 5513 jasóspirim, 1222 júkti áıel jáne 496 laktatsııa kezeńindegi analar ekpemen qamtyldy, dep habarlaıdy QazAqparat tilshisi.

Jyl basynan beri oblysta 14- jasqa deıingi 322 bala koronavırýspen aýyryp, 209 synypqa karantın jarııalanǵan bolatyn.

Mamandardyń aıtýynsha epıdemıologııalyq tekserý kezderinde belgili bolǵandaı, balalardyń kóbisi Covid-19 ınfektsııasyn naýqas ata-analary men jáne bilim mekemelerinde baılanysta bolǵanda juqtyrǵan.
Sondyqtan eresekterdiń ǵana emes, jasóspirimderdiń de koronavırýsqa qarsy ımmýnıtetin kóterý mańyzdy.
Aıta keteıik, Túrkistan oblysyna «Pfizer» vaktsınasynyń 17550 dana mólsherindegi ekinshi partııasy jetkizilgen.