Túrkistan oblysynda «Parasatty otbasy» baıqaýynyń úzdikteri marapattaldy

TÚRKІSTAN. QazAqparat – Túrkistan oblysynda QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti men oblystyq adamı áleýetti damytý basqarmasy «Parasatty otbasy» baıqaýyn qorytyndylady. Otbasy qundylyqtaryn nasıhattaý men januıa mártebesin joǵarylatý jáne ozat oqýshyny anyqtaýǵa baǵyttalǵan baıqaýdyń úzdikteri marapattaldy, dep habarlaıdy QazAqparat tilshisi.

Agenttik tarapynan bastaý alyp, búginde Respýblıka boıynsha barlyq aımaqtarda ótkizilgen sharaǵa Túrkistan oblysynan 5 otbasy qatysty. Baıqaýdyń ashylý saltanatynda sóz sóılegen atalǵan departamenttiń ókili Ǵ.Júndibaev qoǵamda árbir otbasy men balaǵa beriletin tárbıeniń mańyzdylyǵyn atap ótti.

«Adam balasyna otbasy beretin qamqorlyq pen tárbıeni eshbir qoǵamdyq tárbıe almastyra almaıdy. «Otan - otbasynan bastalady» degen maǵynasy tereń ataly sóz bar. Qoǵamnyń tiregi árbir otbasy ekenin baǵzydan bizdiń sanamyzǵa sińirip kelgen. Shyn máninde otbasynda bereke - tynyshtyq bolmasa, azamattardyń qoǵamǵa belsendi úles qosýy múmkin emes», - dedi Ǵ.Júndibaev.

Ár aýdan-qalalardan kelgen otbasy músheleri baıqaýda baq synasyp, óz ónerlerin kórsetti. Árbir januıadaǵy balalardyń oqýda jáne sporttaǵy jetistikteri saralanyp, jetken jetistikteri týraly ázirlegen beınerolıkter tamashalandy. Qatysýshylar qazaqy dástúrlerdi jańǵyrtyp, otbasy qundylyqtary men parasattylyq qaǵıdattary boıynsha qoıylǵan saýaldarǵa jaýap berdi. Baıqaý sońynda birinshi oryndy Ordabasy aýdanynan kelgen Aldabergenovter otbasy ıelense, ekinshi oryn Túrkistanda turatyn Shakirovtardyń januıasyna buıyrdy. Al, úshinshi oryn Arys qalasynan kelgen Orynbasarovtar otbasyna berildi.

Sonymen qatar, 2 otbasyǵa «Ónegeli otbasy» jáne «Shyǵarmashyl otbasy» sııaqty yntalandyrý syılyqtary men gramotalar tabystaldy.