Túrkistan oblysynda ózenge qulap ketken 4 jasar qyz áli tabylmady

TÚRKІSTAN. QazAqparat – Túrkistan oblysynda 5 kún buryn ózenge qulap ketken 4 jasar qyz áli tabylmady. Bul týraly Túrkistan oblysy Tótenshe jaǵdaılar departamentiniń baspasóz qyzmeti málimdedi, dep habarlaıdy QazAqparat tilshisi.

Túlkibas aýdanyndaǵy Arys ózenine qulap ketken 4 jasar qyzdy izdestirý jumystary táýlik boıy toqtaýsyz júrgizilip jatyr. Qazir izdeý jumystaryna Túrkistan oblysy TJD-niń jeke quramynan 50 qyzmetker men 1 kınologııalyq esep qyzmeti jáne 4 tehnıka jumyldyrylǵan. Sondaı-aq, Shymkent qalasy tótenshe jaǵdaılar departamentinen, Túrkistan oblysynyń polıtsııa departamentinen jáne jergilikti atqarýshy organ tarapynan arnaıy mamandar men tehnıkalar jumys istep jatyr. 30-dan astam jergilikti turǵyn izdeý jumystaryna qatysyp, ózen arnasyndaǵy árbir jyrany qarap júr.

Aıta keteıik, 17 naýryz kúni saǵat 17:00 shamasynda úlkenderdiń qaraýynsyz, Arys ózenine oınaýǵa barǵan búldirshindi sý aǵyzyp áketken bolatyn.