Túrkistan oblysynda oqýshylar tóbelesine qatysty tergeý amaldary bastaldy

TÚRKІSTAN. QazAqparat – Túrkistan oblysynda mektep oqýshylary arasynda bolǵan tóbelesten bir bala aýrýhanaǵa túsip, oǵan ota jasaldy. Polıtsııa departamentiniń basshylyǵy istiń tergelýin óz baqylaýyna aldy, dep habarlaıdy QazAqparat tilshisi.

Oqıǵa 6 maýsym kúni Kentaý qalasyna qarasty Qusshy ata aýylynda bolǵan. Mektep oqýshylary joldyń eki jaq betine turyp, bir-birine tas atqan, tóbelesken. Saldarynan bir balanyń bas súıegi synyp, ol aýrýhanaǵa jetkizildi.

«Atalǵan fakti boıynsha Kentaý qalalyq polıtsııa bólimi QR Qylmystyq kodeksiniń 293-baby 2-bóligimen sotqa deıingi tergep-tekserýdi bastady. Jastar arasynda janjal týyndap, túsinbeýshilik oryn alǵany anyqtaldy. Jedel-izdestirý is-sharalary barysynda, osy iske qatysty Saýran aýdanynyń kámeletke tolmaǵan turǵyny der kezinde anyqtalyp, polıtsııaǵa jetkizildi. Ol óz kinásin moıyndady. Qazirgi ýaqytta sotqa deıingi tergep-tekserý amaldary júrgizilip jatyr. Oqıǵanyń tolyq mán-jaıy anyqtalýda. Іs Túrkistan oblysy Polıtsııa departamenti bastyǵynyń qatań baqylaýynda» - delingen Túrkistan oblysy Polıtsııa departamentiniń baspasóz qyzmeti taratqan aqparatta.

Al Kentaý qalalyq ortalyq aýrýhanasynyń bas dárigeri Asylbek Ýtebaev jaraqat alǵan balanyń jaǵdaıy qazir qalypty ekenin aıtty.

«Balaǵa ota jasalyp, travmatologııa bólimshesine aýystyryldy. Jaǵdaıy qalypty» - dedi dáriger.