Túrkistan oblysynda «Nur Otan» qyzmetkerleri halyqpen sóılesý mádenıetine úırenýde

TÚRKІSTAN. QazAqparat – Túrkistan oblysynda «Nur Otan» partııasynyń qyzmetkerlerine arnalǵan biliktilikti arttyrý semınar-keńesi ótýde. Shara barysynda partııa músheleri halyqpen keri baılanysta jáne antıkrızıstik jaǵdaılarda ózin-ózi ustaý men sóılese bilý mádenıetine úırenetin bolady, dep habarlaıdy QazAqparat tilshisi.

Mundaı tapsyrmany óńir ákimi, partııa fılıalynyń tóraǵasy Ómirzaq Shókeev oblystyq «Nur Otan» partııasy Saıası keńesiniń otyrysynda tapsyrǵan bolatyn. Semınarda partııalyqtar «Startegııalyq menedjment», «Strategııalyq qujattardy taldaý jáne qoldaný», «Jańa aqparattyq medıa-tehnologııalardy tıimdi basqarý», «Emotsıonaldy ıntellekt», sonymen qatar «Storıtellıng», «Saraptaý negizderi» taqyrybynda dáris tyńdady.

Partııa fılıaly tóraǵasynyń birinshi orynbasary Beısen Tájibaevtyń aıtýynsha, bul basqosýdyń qajettiligi men mańyzdylyǵy zor.

«Qoǵam kúndelikti damyp otyrǵan sátte mundaı biliktilikti arttyrý tetigi bizge qajet. Biz túrli máseleler boıynsha halyqqa qyzmet kórsetip, máselesin qaraımyz. Al, bul sátte zamanaýı mehanızmder men jańasha baǵytta strategııa qura bilý - bizdiń qyzmetkerlerdiń mindeti. Sol sebepti, mundaı semınarlardan kútiletin nátıje oń bolary anyq», - dep atap ótti Beısen Tájibaev.

Semınardy Nur-Sultan qalasynan kelgen QR Prezıdenti janyndaǵy Memlekettik basqarý akademııasynyń oqytýshysy, bıznes-analıtık, koých-trener Aınur Ydyrysova ótkizýde. Aýdan, qala jáne oblystyq fılıal qyzmetkerleri úshin uıymdastyrylǵan semınar eki kúnge josparlanǵan. Onyń nátıjesinde qyzmetkerler úshin arnaıy reıtıng jasalyp, halyqqa qyzmet kórsetý sapasy artady dep kútilýde.

Aıta keteıik, «Nur Otan» partııasy «Senim. Dıalog. Bolashaqqa nyq qadam» atty qaıta jandandyrý baǵdarlamasymen jańǵyrý kezeńin bastap, jańa jobalar men zamanaýı júıe tetigin qalyptastyrýda. Máselen, oblystyq partııa fılıaly ashyq formatqa kóship, qoǵamdyq qabyldaýdy áleýmettik jelilerde tikeleı efır arqyly kórsetýdi qolǵa aldy. Endi azamattar áleýmettik jelilerdegi resmı paraqshalar arqyly kez kelgen ýaqytta aryz-shaǵymyn qaldyryp, naqty jaýap ala alady.