Túrkistan oblysynda Naýryz merekesin toılaýǵa birqatar shekteý qoıyldy
Oblys ákiminiń orynbasary óńirde sońǵy táýlikterdegi epıdemıologııalyq ahýaldyń ózgerýine baılanysty osyndaı sharalar qabyldanyp jatqanyn atap ótti.
Onyń aıtýynsha, sońǵy táýlikte oblysta koronavırýs ınfektsııasyn juqtyrǵan 12 jaǵdaı tirkelgen. Al, vırýstyq pnevmonııamen taǵy 5 adam aýrýhanaǵa túsken. Sonymen qatar naýryz merekesine oraı, Túrkistanǵa ózge óńirlerden tek poıyz, ushaq jáne avtobýspen 11 myńnan astam adam keledi dep boljanyp otyr.
«31-shi naýryzda Túrkistanda Túrkitildes memleketterdiń yntymaqtastyq keńesiniń beıresmı Sammıti ótedi. Sammıtke Túrki tildes memleketterdiń barlyq basshylary jáne osy uıymnyń baqylaýshysy bolyp tabylatyn Vengrııanyń premer-mınıstri qatysady. Osyǵan oraı, Sammıttiń oıdaǵydaı ótýi úshin koronavırýs indetiniń keń taraýynyń aldyn alý maqsatynda 19-23 naýryz aralyǵynda Túrkistan qalasynda naýryz merekesine arnalǵan sharalar ótkizilmeıdi»,- dedi Sáken Qalqamanov.
Aıta keteıik, buǵan deıin oblys ortalyǵynda birneshe mádenı is-sharalar ótkiziledi dep josparlaǵan bolatyn. Oblystyń bas sanıtar dárigeriniń jańa qaýlysyna sáıkes, 19 men 23-shi naýryz aralyǵynda óńirlerdegi aýdan-qalalarda karantın talaptaryn saqtaı otyryp, jıyny 50 adamnan aspaıtyn shaǵyn sharalar ǵana ótedi. Saltanatty sharalarda ákimdik qyzmetkerleri men eriktiler jáne quqyq qorǵaý organdarynan quralǵan mobıldi toptar baqylaýǵa alady.