Túrkistan oblysynda muǵalimnen para alǵan mektep dırektoryna úkim shyqty

TÚRKІSTAN. QazAqparat – Túrkistan oblysy Túlkibas aýdanyndaǵy Maılykent jalpy orta mektebiniń dırektory muǵalimnen para alǵan, dep habarlaıdy QazAqparat tilshisi.

Mekeme basshysy aǵylshyn tili páni muǵaliminen 200 myń teńge para alǵan.

Sot úkimimen mektep dırektory - «A» esimdi azamatsha QR Qylmystyq kodeksiniń 366-baby 2- bóligimen kináli dep tanyldy. Sottalýshy óz kinásin tolyq moıyndap, qamqorlyǵynda kámeletke tolmaǵan eki balasy baryn eskerip, oǵan aıyppul túrinde jaza taǵaıyndaýdy surady.

«Sot úkimimen oǵan memlekettik qyzmette, sýdıa qyzmetin, jergilikti ózin-ózi basqarý organdarynda, Qazaqstan Respýblıkasynyń Ulttyq bankinde jáne onyń vedomstvolarynda, qarjy naryǵy men qarjy uıymdaryn retteý, baqylaý jáne qadaǵalaý jónindegi ýákiletti organda, memlekettik uıymdarda jáne kvazımemlekettik sektor sýbektilerinde laýazymdardy atqarýǵa ómir boıyna tyıym salyndy.

Sondaı-aq paranyń otyz eselengen sommasy mólsherinde, ıaǵnı 6 mln teńge kóleminde aıyppul salý jazasy taǵaıyndaldy. Úkim zańdy kúshine engen joq», - delingen Túrkistan oblystyq sotynyń baspasóz qyzmeti taratqan habarlamada.