Túrkistan oblysynda memqyzmetke ornalasý konkýrsyn ótkizý merzimi 30%-ǵa qysqarǵan
Buǵan deıin óńirdegi memlekettik organdar konkýrstardyń úsh túrin júıeli túrde ótkizip kelgen bolatyn, dep habarlaıdy QazAqparat tilshisi.
QR Memlekettik qyzmet isteri agenttiginiń Túrkistan oblysy boıynsha departamentiniń basshysy, Ádep jónindegi keńes tóraǵasy Aıbek Shilmanovtyń sózinshe, jańa bastama bos oryndardy ýaqytty únemdi paıdalaný arqyly jyldam túrde toltyrýǵa óz septigin tıgizedi. Sonymen qatar, memlekettik qyzmetshilerdiń jalpy konkýrstarǵa qatysý tártibi de jeńildetilgen.
«Qazirgi tańda Túrkistan oblysynda 6583 memlekettik qyzmetshi jumys istese, bos laýazymdar sany 440-y quraıdy. Memlekettik qyzmetshiler endi jalpy konkýrstarǵa jalpy negizde emes, ishki konkýrsqa uqsas jeńildetilgen tártip boıynsha qatysady. Bul rette, konkýrssyz taǵaıyndalatyn memlekettik organnyń birinshi basshylarynyń kómekshileri, keńesshileri, baspasóz hatshylary testileýden jəne jeke qasıetterin baǵalaýdan ótken jaǵdaıda osy laýazymǵa ornalasqannan keıin bir jyl ótken soń ǵana ishki konkýrsqa qatysýǵa jiberiledi», - dedi Aıbek Aqbergenuly.
Departament basshysy aýyldyq okrýgterdiń ákimderine ókilettik merzimi aıaqtalǵannan keıin bir jyl ishinde kez-kelgen «B» korpýsy laýazymdaryna konkýrstyq irikteýsiz ornalasý quqyǵy berilgendigin de atap ótti.
Onyń aıtýynsha, «A» korpýsynyń kadr rezervin qalyptastyrý jáne oǵan irikteý tártipteri alynyp tastalǵan.
«Aýyldyq okrýgterdiń ákimderi apparattarynda jumys isteýge nıet bildirgen azamattardy áleýmettik qoldaý maqsatynda olardy «Dıplommen aýylǵa» baǵdarlamasyna engizý kózdelýde. Budan bólek, memlekettik qyzmet isteri agenttiginiń bastamasymen elimizde alǵash ret ótkizilgen «Úzdik aýyl ákimi» respýblıkalyq konkýrsynyń óńirlik kezeńi aıaqtalǵan. Óńirlik komıssııa tarapynan eń kóp ball jınap, ózgelerden ozyq shyqqan 1 kezeńniń jeńimpazy bolyp Jetisaı aýdanynyń Jańa aýyl aýyldyq okrýginiń ákimi – Bahtııarov Nurlybek Perdebekuly anyqtalǵan bolatyn», - dedi departament basshysy.
Ádep normalaryn buzý deregi boıynsha aǵymdaǵy jyldyń І-jartyjyldyǵynda ótken jyldyń osy kezeńimen salystyrǵanda tártiptik ister 50%-ǵa azaıǵan. Sondaı-aq, memlekettik qyzmetshilerdiń tártiptik jaýapqa tartylý deıgeıi ótken jyldyń osy kezeńimen salystyrǵanda 13%-ǵa kemigen. Budan bólek, departament aǵymdaǵy jyldyń І-jartyjyldyǵynda memlekettik qyzmet kórsetý zańnamasyn saqtaý máselesi boıynsha 17 tekserý júrgizip, nátıjesinde 208 zańbuzýshylyq anyqtalǵan. Onyń basym bóligi jer qatynastary (73%), halyqty áleýmettik qorǵaý (12%), sáýlet jáne qurylys –(3%), bilim (3%) salalarynda bolǵan. Bul rette, departament usynysymen zańbuzýshylyqtarǵa jol bergen memlekettik organdardyń 10 qyzmetkeri túrli tártiptik jaýapqa tartylǵan.