Túrkistan oblysynda mas kúıde rýlge otyrǵan 500-ge jýyq júrgizýshi anyqtaldy

TÚRKІSTAN. QazAqparat – Túrkistan oblysynda polıtseıler jol-kólik apattarynyń aldyn alý men jolda júrý erejelerin óreskel buzýshylardy anyqtaý maqsatynda turaqty túrde reıdtik sharalar ótkizip turady. Sonyń nátıjesinde jyl basynan mas kúıinde kólik aıdaǵan 500-ge tarta júrgizýshi anyqtaldy, dep habarlaıdy QazAqparat tilshisi.

Oblystyq Polıtsııa departamentiniń baspasóz qyzmetinen málim etkendeı, Shardara aýdanynda ýchaskelik polıtsııa ınspektory I.Dáýirbaevqa jergilikti turǵyn belgisiz bireý jol erejesin buzyp, mas halde kólik basqaryp júrgeni jaıly habarlaǵan. Tártip saqshylary jolda basqalarǵa kedergi keltirgen kólikti dereý anyqtap, tabady. Tekserý barysynda, júrgizýshi kólikti basqarý quqyǵynan aıyrylǵany, biraq soǵan qaramastan masań kúıde rýlge qaıta otyrǵany anyqtaldy. Arnaıy júrgizilgen medıtsınalyq zertteýdiń qorytyndysyna sáıkes, kólik tizgindeýshiniń orta dárejeli mas ekeni rastaldy.

Atalǵan jaıt sotqa deıingi tergep-tekserýdiń biryńǵaı tizilimine engizilip, QR QK-niń 346-baby «Kólik quraldaryn basqarý quqyǵynan aıyrylǵan, alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy, sol sııaqty kólik quralyn osyndaı adamnyń basqarýyna berý nemese kólik quralyn osyndaı adamnyń basqarýyna jol berý» boıynsha tirkeldi.

Sotqa deıingi tergeý amaldary júrgizilip, jınaqtalǵan qujattar sotqa joldandy.