Túrkistan oblysynda Marokko shegirtkesi 90 myń gektar alqapty búldirdi

TÚRKІSTAN. QazAqparat- Túrkistan oblysyndaǵy 53 aýyldyq okrýgte Marokko shegirtkesine qarsy kúres júrgizilip jatyr. Bul týraly óńirlik kommýnıkatsııalar qyzmetinde ótken brıfıngte QR AShM agroónerkásip keshenindegi memlekettik ınspektsııa komıtetiniń Túrkistan oblystyq aýmaqtyq ınspektsııasynyń basshysy Ibragım Begasılov málimdedi, dep habarlaıdy QazAqparat tilshisi.

Spıkerdiń sózinshe, óńirde shegirtkege qarsy kúres sharalary josparǵa saı atqarylyp jatyr.

Bul rette bir kúnde 3500-4000 gektar alqapta hımııalyq óńdeý jumysy júrgizilip jatyr.

Oǵan 26 jerústi búrikkish tehnıkasy men 1 AN-2 jeńil ushaǵy jumyldyrylǵan.

«Túrkistan oblysynda asa qaýipti marokko shegirtkesine qarsy júrgiziletin hımııalyq óńdeý jumysy 8 sáýir kúni bastaldy. Josparlanǵan 705 000 gektar alqaptyń 570 000 gektarynda zertteý, anyqtaý jumysy júrgizildi. Marokko shegirtkesiniń qonystanǵan aýmaǵy 90 myń gektardy qurap otyr. Onyń 48000 gektarynda ekonomıkalyq zııandy sheginen asqany anyqtalyp, 41000 gektar alqapqa hımııalyq óńdeý jumystary júrgizildi», - dedi Ibragım Begasılov.

Bıyl asa qaýipti úıirli shegirtkelerge qarsy hımııalyq óńdeý jumystary men fıtosanıtarııalyq is-sharalar 10 aýdannyń 53 aýyldyq okrýginde júrgizilip jatyr.

Oblys boıynsha marokko shegirtkesi kóp taraǵan aımaqtar retinde belgilengen Saryaǵash aýdanynda 24 000 gektar, Arys qalasynda 11 000 gektar óńdelgen.

Óńirdegi shegirtkege qarsy kúres jumystaryn tolyqtaı aıaqtaýǵa áli 10 kúndeı ýaqyt bar. Bul rette shegirtkege qarsy kúres kúsheıtilgen.

Aldaǵy ýaqytta marokko shegirtkesine qarsy barlyǵy 67 290 ga alqapta, onyń ishinde 59 050 ga jerústi jeldetkish búrikkish tehnıkamen, 8240 ga áýemen hımııalyq óńdeý jumysy júrgizilmek.